டெஹ்ரானில் இருந்து, போர் நிறுத்தம் தொடர்பாக அமெரிக்காவுடன் எந்தவித பேச்சுவார்த்தையும் நடத்தப்போவதில்லை என்று ஈரான் பாதுகாப்புத் துறை அதிகாரிகள் திட்டவட்டமாக தெரிவித்துள்ளதாக தகவல்கள் கூறுகின்றன.
மேற்கு ஆசியாவில் பதற்றம் அதிகரித்துள்ள நிலையில், தங்கள் மீது இஸ்ரேல் மற்றும் அமெரிக்கா இணைந்து தாக்குதல் நடத்துவதாக ஈரான் கூறுகிறது; அதற்கு பதிலடியாக ஈரானும் தாக்குதல்களை தொடர்கிறது. குவைத்தில் அமெரிக்காவின் எப்-15 போர் விமானத்தை ஈரான் ராணுவம் சுட்டு வீழ்த்தியதாகவும், அந்த விமானம் செல்போன் டவர் மீது மோதி விழுந்ததாகவும் கூறப்படுகிறது; விமானி உயிர் தப்பினார்.
இதற்கிடையில், ஈரான் ராணுவம், புரட்சிகர காவல்படை மற்றும் போலீசார் ஆயுதங்களை கீழே வைத்து சரணடைய வேண்டும் என எச்சரித்த அமெரிக்க அதிபர் டொனால்ட் டிரம்ப், ஈரானுடன் பேச்சுவார்த்தைக்கு தயாராக இருப்பதாகவும் தெரிவித்திருந்தார். மேலும், ஈரான் பேச தயாராக உள்ளது என்றும் அவர் கூறினார்.
ஆனால் அந்த கூற்றை ஈரானின் உயர் தேசிய பாதுகாப்பு கவுன்சில் செயலாளர் அலி லாரிஜானி மறுத்துள்ளார். அதே நேரத்தில், போர் நிறுத்தம் குறித்து வாஷிங்டனுடன் பேச்சுவார்த்தை நடத்தும் திட்டமே இல்லை என பாதுகாப்புத் துறை அதிகாரிகளும் மீண்டும் வலியுறுத்தியுள்ளனர்.
மூன்றாவது நாளாக குவைத்தை குறிவைத்து ஈரான் தாக்குதல் நடத்தி வருவதாகவும், இதனால் துபாய், அபுதாபி மற்றும் குவைத் விமான நிலையங்களில் செயல்பாடுகள் நிறுத்தி வைக்கப்பட்டுள்ளதாகவும் தெரிவிக்கப்பட்டுள்ளது. ஏவுகணை தாக்குதல்களால் துபாய், அபுதாபி, தோஹா நகரங்களில் குண்டு வெடிப்பு சத்தம் கேட்பதாகவும், சைப்ரஸ் நாட்டின் மீது நடந்த தாக்குதலில் அங்குள்ள பிரிட்டன் விமானப்படை தளத்திற்கு லேசான சேதம் ஏற்பட்டதாக சைப்ரஸ் அரசு கூறியதாகவும் தகவல்கள் தெரிவிக்கின்றன.
