தஞ்சாவூர் அருகே செங்கிப்பட்டியில் நடந்த தவெக நிர்வாகிகள் கூட்டத்தில் தவெக தலைவர் விஜய் திமுக மீது கடுமையாக விமர்சனம் செய்தார். “திமுக ஒரு தீயசக்தி” என்று இளைஞர்களே சொல்லத் தொடங்கியுள்ளதாக கூறி, வரவிருக்கும் தேர்தலை தமிழகத்தை மையமாகக் கொண்ட போட்டியாகவே பார்க்க வேண்டும் என்றார்.
வேலூர் கூட்டத்தில் கூறிய கருத்துகளை நினைவுபடுத்திய அவர், தன் பேச்சை திரித்து “பாஜவுக்காக பேசுகிறார்” என கூறப்படுவதாக குற்றம்சாட்டினார். சிறுபான்மை மக்களை பயமுறுத்தி ஏமாற்றும் முயற்சிகள் நடக்கின்றன என்றும், இனிமேல் அது தொடர முடியாது என்றும் தெரிவித்தார்.
“டில்லி” என்ற கோஷத்தை அரசியல் வசனமாக பயன்படுத்தி, ஊழல் குற்றச்சாட்டுகளுக்குப் பிறகு ரெய்டு வந்தால் பாதுகாப்பு தேடுவது யார் என்பதும் மக்களுக்கு தெரியும் எனவும் அவர் கூறினார். “தமிழகத்தை காப்பாற்றுவது திமுக, ஸ்டாலின்” என்ற வாதம் “ஒர்க்அவுட் ஆகாது” என்றும், அடுத்த தேர்தலில் “விசில்” தவெகக்கே எனவும் தெரிவித்தார்.
விவசாயிகளைப் பற்றி பேசும்போது, அடுத்த ஜென்மத்தில் விவசாயி குடும்பத்தில் பிறக்க ஆசைப்படுவதாக கூறினார். விவசாயம் குறித்து தன்னிடம் முழுமையான அறிவில்லை என்பதை ஒப்புக்கொண்டாலும், அவர்கள் அனுபவிக்கும் கஷ்டம் தெரியும் என்றும், ஆட்சி அமைந்தால் விவசாயப் பிரச்னைகள் தீர்க்க வேண்டிய முக்கிய விஷயங்களில் ஒன்றாக இருக்கும் என்றும் கூறினார்.
நிலத்தடி நீர்மட்டத்தை பாதுகாக்காததும், மணல் மற்றும் கனிம வள கொள்ளையும் மாநிலத்தை நெருக்கடிக்குத் தள்ளுவதாக அவர் குற்றம்சாட்டினார். மணல் கொள்ளையர்கள் மீது போதுமான நடவடிக்கை இல்லை என நீதிமன்றங்கள் கூறியதாகவும், மணல்–கனிம வள மாபியாக்களுக்கு திமுக ஆதரவு இருப்பதாகவும் விமர்சித்து, தண்ணீர், மணல், கனிம வளம் என தமிழக வளங்கள் தற்போதைய ஆட்சியில் சிதைவடைவதாக எச்சரித்தார்.
