2025ஆம் ஆண்டுக்கான யுபிஎஸ்சி சிவில் சர்வீஸ் தேர்வு முடிவுகளை யுபிஎஸ்சி வெளியிட்டுள்ளது. இதில் தமிழகத்தைச் சேர்ந்த தேர்வர்கள் குறிப்பிடத்தக்க சாதனை படைத்துள்ளனர். மதுரையைச் சேர்ந்த ராஜேஸ்வரி சுவே தேசிய அளவில் 2-ம் இடமும், சென்னையைச் சேர்ந்த ராஜா மொகைதீன் 7-ம் இடமும் பெற்றுள்ளனர்.
ஐஏஎஸ், ஐபிஎஸ் உள்ளிட்ட பணியிடங்களை நிரப்ப ஆண்டுதோறும் யுபிஎஸ்சி சிவில் சர்வீஸ் தேர்வை நடத்துகிறது. 2025 தேர்வு மூலம் 1,087 காலிப்பணியிடங்களை நிரப்ப திட்டமிடப்பட்ட நிலையில், ஆகஸ்டில் எழுத்துத் தேர்வும் கடந்த மாதம் நேர்முகத் தேர்வும் நடைபெற்றது.
யுபிஎஸ்சி அறிவிப்பின்படி, மொத்தம் 958 பேரை பல்வேறு சிவில் சர்வீஸ் பணிகளுக்கு நியமிக்க பரிந்துரை செய்யப்பட்டுள்ளது. தேசிய அளவில் அனுஜ் அக்னிஹோத்ரி முதலிடமும், ஆகான்ஷ் துல் 3-ம் இடமும் பெற்றுள்ளனர்.
மதுரை மாவட்டம் வாடிப்பட்டியைச் சேர்ந்த ராஜேஸ்வரி சுவே, ஏற்கனவே டிஎன்பிஎஸ்சி குரூப்-1 தேர்வில் வெற்றி பெற்று திண்டுக்கல்லில் துணை கலெக்டராக பணியாற்றி வருகிறார். மேலும், “நான் முதல்வன்” திட்டத்தின் மூலம் பயிற்சி பெற்றதாகவும் தெரிவிக்கப்பட்டுள்ளது.
தமிழகத்தில் இருந்து கோவையைச் சேர்ந்த ஸ்ருதி 18-ம் இடம் பெற்றுள்ளார். இம்முறை தேசிய அளவிலான முதல் 10 இடங்களில் 3 பெண்கள் இடம்பெற்றுள்ளதாகவும் யுபிஎஸ்சி குறிப்பிட்டுள்ளது.
