ராமநாதபுரம் காவல் கண்காணிப்பாளர் (எஸ்.பி.) அலுவலகத்தில் உதவியாளராக பணியாற்றும் ஷேக் முகம்மது கபிசுதீன் (29), அகில இந்திய குடிமைப்பணி (சிவில் சர்வீசஸ்) தேர்வில் 485வது இடம் பிடித்துள்ளார். சமீபத்தில் வெளியான தேர்வு முடிவுகளில் அவரது பெயர் இடம்பெற்றுள்ளது.
ராமநாதபுரம் மாவட்டம் சிக்கல் கிராமத்தைச் சேர்ந்த இவர், சேகு அப்துல் காதர் - சர்மிளா பானு தம்பதியின் மகன். ராமநாதபுரம் செய்யது அம்மாள் மேல்நிலைப் பள்ளியில் பிளஸ் 2 வரை படித்து, பின்னர் மதுரை தியாகராஜர் பொறியியல் கல்லூரியில் மேற்படிப்பை முடித்துள்ளார்.
எஸ்.பி. அலுவலகத்தில் பணியைத் தொடர்ந்து கொண்டே, ஏழு ஆண்டுகளாக குடிமைப்பணி தேர்வுக்குத் தயாராகி வந்ததாக அவர் தெரிவித்தார். இதற்கு முன்பு நான்கு முறை நேர்முகத் தேர்வு வரை சென்ற பின்னரே இந்த வெற்றியை பெற்றதாகவும் கூறினார்.
தேர்வு முடிவில் மகிழ்ச்சி தெரிவித்த அவர், இந்திய வன சேவை (ஐ.எப்.எஸ்.) அல்லது இந்திய காவல் சேவை (ஐ.பி.எஸ்.) கிடைக்கும் என எதிர்பார்ப்பதாக கூறினார். கடந்த மாதம் பெண் குழந்தை பிறந்த நிலையில், இந்த வெற்றியை குடும்பத்திற்கான நல்ல தருணமாகவும் அவர் குறிப்பிட்டார்.
