வாஷிங்டன்: ஈரானின் எண்ணெய் கட்டமைப்புகளை குறிவைத்து இஸ்ரேல் நடத்திய சமீபத்திய தாக்குதலுக்கு அமெரிக்கா அதிருப்தி தெரிவித்துள்ளதாக வெள்ளை மாளிகை அறிக்கையில் கூறப்பட்டுள்ளது. ஈரான்–இஸ்ரேல் இடையே கடந்த சுமார் 10 நாட்களாக பரஸ்பர தாக்குதல்கள் நீடித்து வரும் நிலையில் இந்த தகவல் வெளியாகியுள்ளது.
செய்திகளின்படி, ஈரானின் எண்ணெய் சுத்திகரிப்பு நிலையங்கள் மற்றும் எண்ணெய் சேமிப்பு கிடங்குகளை இஸ்ரேல் தாக்கியதால் பெரிய அளவில் தீப்பற்றியது; இதில் நான்கு பேர் உயிரிழந்ததாக தெரிவிக்கப்பட்டது. இதற்கு பதிலடியாக ஈரான் ஹார்முஸ் ஜலசந்தியை முடக்கியதாகவும், இதனால் கச்சா எண்ணெய் விலை நான்கு ஆண்டுகளில் இல்லாத அளவுக்கு கடுமையாக உயர்ந்ததாகவும் கூறப்படுகிறது.
28ம் தேதி போர் தொடங்கியதிலிருந்து அமெரிக்கா மற்றும் இஸ்ரேல் இணைந்து ஈரான் மீது தாக்குதல் நடத்தி வந்தாலும், இம்முறை எண்ணெய் வளங்களை குறிவைத்த நடவடிக்கை இரு நாடுகளுக்கிடையே முதல் பெரிய கருத்து வேறுபாட்டை உருவாக்கியதாக ஒரு செய்தி நிறுவனம் தெரிவித்துள்ளது. ஏவுகணை ஏவுதலுக்கான வாகனங்களுக்கு எரிபொருள் நிரப்ப ஈரான் இந்த மையங்களை பயன்படுத்தி வருவதால் தாக்குதல் நடத்தியதாக இஸ்ரேல் அமெரிக்காவிடம் விளக்கமளித்ததாக கூறப்படுகிறது.
ஆனால், ராணுவ இலக்குகளை மட்டுமே தாக்குவதாக முன்பு கூறிய நிலையில், பொருளாதார கட்டமைப்புகள் இவ்வளவு பெரிய அளவில் சேதமடைந்தது அமெரிக்காவை ஆச்சரியத்திலும் அதிருப்தியிலும் ஆழ்த்தியதாக தகவல்கள் தெரிவிக்கின்றன. டிரம்பின் ஆலோசகர் ஒருவர், அதிபருக்கு இந்த தாக்குதல் பிடிக்கவில்லை என்றும், எண்ணெய் வளங்களை பாதுகாக்கவே அவர் விரும்புவதாகவும், இதுபோன்ற தாக்குதல்கள் எண்ணெய் விலையை உயர்த்தி மக்களை பாதித்து அதிருப்தியை உருவாக்கக்கூடும் என்றும் கூறியதாக தெரிவிக்கப்பட்டது.
டெஹ்ரான் நகரமும் அதைச் சுற்றியுள்ள மூன்று எண்ணெய் கிடங்குகளும் ஒரு சுத்திகரிப்பு நிலையமும் தாக்கப்பட்டதாக கூறப்படுகிறது. தீ வேகமாக பரவி நச்சு கலந்த கரும்புகை பரவிய காட்சிகள் வீடியோவாக வெளியிடப்பட்டதாகவும், கசிந்த எரிபொருள் தீப்பற்றி வீதிகளில் ‘நெருப்பு ஆறு’ போல ஓடியதாக மக்கள் கூறியதாகவும் தகவல்கள் வெளியாகின. எண்ணெய் மற்றும் கரியுடன் கலந்த கருப்பு நிற மழை பெய்ததாகவும், அமில மழை குறித்த அறிக்கையையடுத்து மக்கள் வீட்டுக்குள்ளேயே இருக்குமாறு எச்சரிக்கப்பட்டதாகவும் கூறப்படுகிறது.
