நாடு முழுவதும் பெண்களுக்கு ஊதியத்துடன் மாதவிடாய் விடுமுறையை கட்டாயமாக்க உத்தரவிட வேண்டும் எனக் கோரிய ரிட் மனுவை சுப்ரீம் கோர்ட் மார்ச் 13 அன்று தள்ளுபடி செய்தது.
வழக்கறிஞர் சைலேந்திரா திரிபாதி தாக்கல் செய்த மனுவில், மாணவிகள் மற்றும் பணிக்கு செல்லும் பெண்கள் உள்ளிட்ட அனைவருக்கும் மாதவிடாய் காலத்தில் விடுமுறை வழங்கும் வகையில் மாநிலங்கள் வழிகாட்டுதல்கள் உருவாக்க நீதிமன்றம் உத்தரவிட வேண்டும் எனக் கோரப்பட்டிருந்தது.
தலைமை நீதிபதி சூர்யகாந்த், நீதிபதி ஜாய்மல்யா பாக்சி ஆகியோர் அடங்கிய அமர்வு, இதை சட்டப்படி கட்டாயமாக்கினால் பெண்களுக்கு வேலை கிடைப்பது கடினமாகலாம்; முதலாளிகள் பெண்களை பணியமர்த்தத் தயங்கும் நிலை உருவாகி, அவர்களின் தொழில்முன்னேற்றம் பாதிக்கப்படும் எனக் குறிப்பிட்டது.
மேலும், இப்படியான கட்டாய விதி உளவியல் ரீதியாக தாக்கத்தை ஏற்படுத்தி, பெண்கள் ஆண்களை விட தாழ்ந்தவர்கள் என்ற தவறான பிம்பத்தை உருவாக்கும் அபாயம் இருப்பதாக நீதிபதிகள் தெரிவித்தனர்; இதனால் பெண்களை வேலைக்கு எடுப்பதை ஊக்கப்படுத்தாமல் தடுக்கும் சூழலும் உருவாகலாம் என்றனர்.
பல தனியார் நிறுவனங்கள் தன்னார்வமாக இத்தகைய விடுமுறையை வழங்குவது நல்லது என்றாலும், அதை சட்டத்தில் கட்டாய நிபந்தனையாக மாற்றுவது பெண்களின் வாழ்க்கைக்கு பாதிப்பை ஏற்படுத்தக்கூடும் என அமர்வு கூறியது. மேலும், இந்த விவகாரத்தில் எந்தப் பெண்ணும் நீதிமன்றத்தை அணுகவில்லை என்பதையும் சுட்டிக்காட்டி, மனுவின் கோரிக்கை தேவையற்ற அச்சத்தை உருவாக்கும் வகையில் இருப்பதாகக் கூறி தள்ளுபடி செய்தது.
