மதுரை மாவட்டம் அழகர்கோவில் கள்ளழகர் கோயிலின் பதினெட்டாம்படி கருப்பணசுவாமி சன்னதியில், அர்ச்சகர்கள் தட்டில் விழும் காணிக்கையை கோயில் ஊழியர் எடுத்து உண்டியலில் செலுத்தும் நடைமுறை சர்ச்சையை ஏற்படுத்தியுள்ளது. இதனால் அர்ச்சகர்களும் பக்தர்களும் அதிருப்தி தெரிவித்துள்ளனர்.
கருப்பணசுவாமி பலரின் குலதெய்வமாக கருதப்படுகிறார். சன்னதி முன்புள்ள படிகள் அல்லது கதவுகளின் அருகே பக்தர்கள் காணிக்கை செலுத்துவது வழக்கம்; இதை “படிக்கு காசு போடுதல்” என்ற நேர்த்திக்கடனாகவும் பார்க்கின்றனர். காணிக்கையை முறைப்படுத்தும் நோக்கில் அறநிலையத்துறை நிர்வாகம் முன்பே சன்னதி முன் இருபுறமும் நான்கு உண்டியல்களை அமைத்திருந்ததாகவும், அதில் சேரும் தொகை கோயில் மேம்பாட்டு பணிகளுக்கு பயன்படுத்தப்படுவதாகவும் கூறப்படுகிறது.
விசேஷம், முகூர்த்த நாட்களில் நாள் முழுவதும் கூட்டம் அதிகமாக இருக்கும் நிலையில், அர்ச்சகர்கள் தங்கள் சொந்த செலவில் உதவியாளர்களை நியமித்து பணியாற்றுவதாகவும், பக்தர்கள் வழங்கும் காணிக்கை அவர்களுக்குள் பகிர்ந்தளிக்கப்படுவதாகவும் தெரிவிக்கின்றனர். ஆனால் கடந்த ஒரு வாரமாக, நான்கு உண்டியல்களில் ஒன்றை சன்னதி கதவுகள் முன்பே வைத்ததாகவும், அர்ச்சகர் தட்டில் பக்தர்கள் விருப்பத்துடன் இடும் காணிக்கையை உடனுக்குடன் எடுத்து உண்டியலில் செலுத்துவதாகவும் குற்றச்சாட்டு எழுந்துள்ளது.
உண்டியல் வைக்கப்பட்ட இடம் தரிசனத்திற்கு இடையூறாக இருப்பதாகவும், கதவுகளின் கீழ் தெரியும் சுவாமியின் பாதம் மறைவதாகவும் பக்தர்கள் கூறுகின்றனர். இதற்கு கோயில் நிர்வாகம், சன்னதியில் பணியமர்த்தப்பட்ட மூன்று அர்ச்சகர்களுக்கும் சம்பளம் உள்ளிட்ட படிகள் வழங்கப்படுவதால் தட்டில் வரும் காணிக்கை உண்டியலிலேயே செலுத்த வேண்டும் என்று ஏற்கனவே அறிவுறுத்தப்பட்டுள்ளதாக தெரிவித்தது. அதே நேரத்தில், இடையூறு இல்லாத மாற்று இடத்தில் உண்டியலை வைக்க ஏற்பாடு செய்யப்படும் என்றும் கூறியுள்ளது.
மதுரை நேதாஜி ரோடு பாலதண்டாயுதபாணி கோயிலில் இதேபோன்ற நடவடிக்கை சர்ச்சையான பின்னர் கைவிடப்பட்டதாகவும் குறிப்பிடப்படுகிறது. அதுபோல் அழகர்கோவிலிலும் நடைமுறை மாற்றம் செய்ய வேண்டும் என பக்தர்கள் வலியுறுத்துகின்றனர்.
