ஆட்சி நிர்வாகம், கூட்டணி தொகுதி பங்கீடு குறித்து மா.கம்யூ. விமர்சனம்
மானாமதுரை லாக்கப் மரணம் உள்ளிட்ட தமிழகத்தில் நடைபெறும் சம்பவங்களில் குற்றம் செய்தவர்கள் மீது நடவடிக்கை எடுக்கப்படும் என்ற நம்பிக்கையை மக்கள் மத்தியில் உருவாக்க வேண்டும் என மா.கம்யூ. மாநில செயலர் சண்முகம் தெரிவித்தார்.
ராமநாதபுரம் மாவட்டம் பரமக்குடியில் நடந்த கட்சி கூட்டத்தில் பேசிய அவர், சம்பந்தப்பட்ட போலீசார் மீது உடனடியாக நடவடிக்கை எடுத்திருந்தால் போராட்டம் நீடித்திருக்காது என்றார். மேலும், தி.மு.க. ஆட்சியை காவல்துறை காப்பாற்ற முடியாது; மக்கள் தான் ஆட்சியை நிலைநிறுத்துவார்கள் எனவும் கூறினார்.
கூட்டணி நிலவரம் குறித்து, காங்கிரசுக்கு கூடுதல் தொகுதிகளை தி.மு.க. வழங்கியுள்ளதாக அவர் குறிப்பிட்டார். தே.மு.தி.க.-க்கு ஏற்கனவே வழங்கப்பட்ட ராஜ்யசபா எம்.பி. இடத்துக்கு மேலாக கூடுதல் தொகுதிகள் வழங்கப்படலாம் என்ற பேச்சும் இருப்பதாகவும் தெரிவித்தார்.
மா.கம்யூ. கட்சி கடந்த முறை போட்டியிட்ட அதே எண்ணிக்கையிலான தொகுதிகளில் திருப்தி அடையாது; இரட்டை இலக்கத்தில் தொகுதிகளை பெற முயற்சிப்போம், மேலும் எம்.எல்.ஏ. எண்ணிக்கையை உயர்த்த விரும்புகிறோம் என சண்முகம் கூறினார்.
புதிதாக கட்சி தொடங்கிய விஜய் குறித்து பேசிய அவர், தமிழகத்தை மாற்ற குறைந்தபட்ச இலக்காக என்ன வைத்துள்ளார் என்று கேள்வி எழுப்பினார். தி.மு.க.-வை ‘தீய சக்தி’ என்று கூறுவது மட்டும் போதாது; வாலிபர் சக்தியை சரியாக பயன்படுத்த வேண்டும் என்றும் அவர் வலியுறுத்தினார்.
