தமிழக சட்டசபை தேர்தல் அட்டவணை அறிவிக்கப்பட்டதைத் தொடர்ந்து, மாநிலம் முழுவதும் தேர்தல் நடத்தை விதிகள் அமலுக்கு வந்துள்ளன.
தமிழகம், கேரளா, அசாம், மேற்கு வங்கம் ஆகிய மாநிலங்கள் மற்றும் புதுச்சேரி யூனியன் பிரதேசத்திற்கான தேர்தல் தேதிகளை தலைமை தேர்தல் கமிஷனர் ஞானேஷ்குமார் ஞாயிற்றுக்கிழமை மாலை அறிவித்தார்.
அறிவிப்புக்குப் பிறகு, தலைமை செயலகம் உள்ளிட்ட அரசு அலுவலகங்களில் முதல்வரின் நிகழ்ச்சிகளைச் சார்ந்த புகைப்படங்கள் மற்றும் காட்சிப்படுத்தல்கள் அகற்றப்பட்டன. தலைமை செயலக நுழைவாயிலில் பொதுமக்கள் பார்வைக்காக வைக்கப்பட்டிருந்த படங்களும் நீக்கப்பட்டதாக தெரிவிக்கப்பட்டது.
விதிகள் அமலில் இருப்பதால், முதல்வர் மற்றும் அமைச்சர்கள் புதிய திட்டங்களை அறிவிக்கவும், புதிய திட்டங்களுக்கு அடிக்கல் நாட்டவும், அரசு நிதியில் புதிய உதவிகளை வழங்கவும் அனுமதி இல்லை. அரசு செலவில் விளம்பரங்கள் செய்வதும் தடை.
மேலும், அரசு வாகனங்கள் மற்றும் அரசு அலுவலகங்களை தேர்தல் பணிக்காக பயன்படுத்தக் கூடாது. அதே நேரத்தில், வழக்கமான நிர்வாகப் பணிகள் தொடரலாம்; ஏற்கனவே நடைமுறையில் உள்ள அரசு திட்டங்களை நிர்வகிக்கலாம்.
