சட்டசபை தேர்தலை முன்னிட்டு, தேர்தல் கமிஷன் அங்கீகாரம் பெற்ற அரசியல் கட்சி பிரதிநிதிகளுடன் ஆலோசனைக் கூட்டம் நேற்று சென்னையில் தலைமைச் செயலகத்தில் நடைபெற்றது. தமிழகத் தலைமை தேர்தல் அதிகாரி அர்ச்சனா பட்நாயக் தலைமையில் கூட்டம் நடந்தது.
கூட்டத்திற்குப் பின் பேசிய தி.மு.க. பிரதிநிதி ஆர்.எஸ். பாரதி, தேர்தல் காலத்தில் தலைவர்களின் சிலைகளை மூட தேர்தல் கமிஷன் உத்தரவிட்டதாக தகவல்கள் வெளியாகியுள்ளதாக கூறினார். எம்.ஜி.ஆர். சிலை மூடப்பட்டதை தொலைக்காட்சியில் பார்த்ததாக தெரிவித்த அவர், உயிரோடு இல்லாத தலைவர்களின் சிலைகளை மூட தேவையில்லை என்ற உயர்நீதிமன்றக் கருத்தை கருத்தில் கொண்டு தேர்தல் கமிஷன் செயல்பட வேண்டும் என்றார்.
அ.தி.மு.க. சார்பில் ஜெயகுமார் மற்றும் இன்பதுரை, ஆளும் கட்சிக்கு ஆதரவான அதிகாரிகள் பறக்கும் படையில் சேர்க்கப்படுவதாகவும், சோதனை நடவடிக்கைகள் தொடர்பான தகவல்கள் முன்கூட்டியே ஆளும் கட்சியினருக்கு தெரிவிக்கப்படுவதாகவும் குற்றம்சாட்டினர். இதைத் தவிர்க்க பறக்கும் படை உள்ளிட்ட பணிகளில் மத்திய அரசு அதிகாரிகளை ஈடுபடுத்த வேண்டும் என்றும், ஒரே இடத்தில் மூன்று ஆண்டுகளுக்கு மேல் பணியாற்றும் அதிகாரிகளை இடமாற்றம் செய்ய வேண்டும் என்றும் அவர்கள் வலியுறுத்தினர்.
காங்கிரஸ் தலைவர் தங்கபாலு, வேட்பாளர்களுக்கு பிரசாரம் உள்ளிட்ட பல பணிகள் இருப்பதால், வேட்பாளர்களின் முகவர்கள் இரண்டு நாட்களுக்கு ஒருமுறை அதிகாரிகளை சந்தித்து கணக்குகளை சமர்ப்பித்தால் போதும் என்ற உத்தரவை நடைமுறைப்படுத்த வேண்டும் என்றார். பா.ஜ. பிரதிநிதி கராத்தே தியாகராஜன், பறக்கும் படை கண்காணிப்பு உள்ளிட்ட பணிகளை வீடியோ பதிவு செய்ய அரசியல் தொடர்புடைய நிறுவனம் நியமிக்கப்பட்டதாக தகவல் வந்துள்ளதாக கூறி, இதனால் முறைகேடுகளுக்கு வாய்ப்பு ஏற்படலாம் என கவலை தெரிவித்தார்.
