ராஜ்யசபா தேர்தல் முடிவுகள் வெளியாகியுள்ள நிலையில், பாஜ தலைமையிலான தேசிய ஜனநாயகக் கூட்டணி (தேஜ) மேலவையில் தனது நிலையை மேலும் வலுப்படுத்தியுள்ளது. காலியாக இருந்த 37 இடங்களில் தேஜ கூட்டணி 24 இடங்களை கைப்பற்ற, மற்ற கட்சிகள் சேர்த்து 13 இடங்களை பெற்றன.
ராஜ்யசபாவின் மொத்த உறுப்பினர் பலம் 250. இதில் மாநிலங்கள் மற்றும் யூனியன் பிரதேசங்களிலிருந்து 238 பேர் தேர்வு செய்யப்படுகின்றனர்; ஜனாதிபதி 12 பேரை நியமிக்கிறார். உறுப்பினர்கள் ஆறு ஆண்டுகள் பதவி வகிப்பதுடன், இரண்டு ஆண்டுகளுக்கு ஒருமுறை ஒரு பகுதி இடங்களுக்கு தேர்தல் நடைபெறுகிறது.
இந்த சுற்றில் 26 பேர் போட்டியின்றி தேர்ந்தெடுக்கப்பட்டனர். மீதமுள்ள 11 இடங்களுக்கு—பீஹாரில் 5, ஒடிசாவில் 4, ஹரியானாவில் 2—தேர்தல் நடைபெற்றது. பீஹாரில் 5 இடங்களையும் தேஜ கூட்டணி வென்றது. ஒடிசாவில் பாஜ 2 இடங்கள், பிஜு ஜனதா தளம் 1 இடம், பாஜ ஆதரவு பெற்ற சுயேச்சை 1 இடம் பெற்றனர். ஹரியானாவில் பாஜவும் காங்கிரசும் தலா ஒரு இடத்தை வென்றன.
போட்டியின்றி தேர்ந்தெடுக்கப்பட்ட 26 இடங்களில் தேஜ கூட்டணி 13 இடங்களை பெற்றது; இதில் பாஜ மட்டும் 7 இடங்களை கைப்பற்றியது. மீதமுள்ள தேஜ கூட்டணி இடங்களை சிவசேனா, இந்திய குடியரசுக் கட்சி (அதாவலே), தேசியவாத காங்கிரஸ் கட்சி, அதிமுக, பாமக, ஐக்கிய மக்கள் கட்சி லிபரல் உள்ளிட்ட கூட்டணிக் கட்சிகள் பெற்றன.
இந்த முடிவுகளுக்குப் பிறகு ராஜ்யசபாவில் தேஜ கூட்டணி உறுப்பினர்கள் எண்ணிக்கை 141 ஆக உள்ளது. இண்டி கூட்டணி 75 ஆகவும், மற்ற கட்சிகள் 27 ஆகவும் உள்ளன. மேலும் 2 இடங்கள் காலியாக இருப்பதால், தற்போதைய உறுப்பினர் எண்ணிக்கை 245 ஆக உள்ளது.
