திருப்பரங்குன்றம் தீபத்தூண் வழக்கு: போலீஸ் பாதுகாப்பு உத்தரவுக்கு இடைக்கால தடை

உத்தரவு நிறைவேற்றத்தில் ‘ஈகோ’ வேண்டாம்

திருப்பரங்குன்றம் மலை தீபத்தூண் தொடர்பான மேல்முறையீடுகளை விசாரித்த மதுரை உயர்நீதிமன்ற இரு நீதிபதிகள் அமர்வு, நீதிமன்ற உத்தரவுகளை நடைமுறைப்படுத்துவதில் ‘ஈகோ’ அல்லது பிடிவாதம் இருக்கக் கூடாது எனக் கருத்து தெரிவித்தது.

வழக்கின் பின்னணி

எழுமலை சேர்ந்த ராமரவிக்குமார் உள்ளிட்டோர் தாக்கல் செய்த மனுவில், 2025 டிசம்பர் 1 அன்று தனி நீதிபதி, வழக்கமான இடங்களுடன் சேர்த்து திருப்பரங்குன்றம் மலை தீபத்தூணிலும் கார்த்திகை தீபம் ஏற்ற வேண்டும் என உத்தரவிட்டார். அந்த உத்தரவு நிறைவேற்றப்படவில்லை எனக் கூறி தொடரப்பட்ட நீதிமன்ற அவமதிப்பு வழக்கில், டிசம்பர் 4 அன்று மனுதாரர் தரப்பில் தீபம் ஏற்ற போலீசார் பாதுகாப்பு அளிக்க வேண்டும் எனவும் உத்தரவிடப்பட்டது.

புதிய பரிந்துரை மற்றும் மேல்முறையீடுகள்

மார்ச் 4 அன்று, தீபத்தூண் உள்ள மலை உச்சிக்கு நீதிமன்றம் நியமிக்கும் ஐவர் குழு சென்று 15 நிமிடம் அடையாள வழிபாடு நடத்த அனுமதிக்கலாம் என தனி நீதிபதி பரிந்துரைத்ததுடன், உரிய பதில் இல்லையெனில் காவல் உயர் அதிகாரிகள் மீது குற்றச்சாட்டுகள் பதிவு செய்யப்படும் என்றும் ஆஜராக வேண்டும் என்றும் குறிப்பிட்டார். இதை எதிர்த்து போலீஸ் கமிஷனர், துணை கமிஷனர் மற்றும் கோவிலின் தற்போதைய செயல் அலுவலர் மேல்முறையீடு செய்தனர். இதற்கிடையில், டிசம்பர் 4 உத்தரவை எதிர்த்த கலெக்டர் மற்றும் போலீஸ் கமிஷனர் மேல்முறையீடு ஏற்கனவே நிலுவையில் இருந்தது.

அமர்வு பிறப்பித்த உத்தரவு

வாதங்களை கேட்ட அமர்வு, மனுதாரர் தரப்பில் தீபம் ஏற்ற போலீஸ் பாதுகாப்பு வழங்க வேண்டும் என்ற தனி நீதிபதியின் உத்தரவுக்கு இடைக்கால தடை விதித்தது. மேலும், ஐவர் குழுவை வழிபாடு நடத்த அனுமதிக்கலாம் என்ற உத்தரவுக்கு எதிரான மேல்முறையீட்டு மனுவை விசாரணைக்கு ஏற்று, வழக்கை ஏப்ரல் 8க்கு ஒத்திவைத்தது.