சென்னை: சட்டமன்றத் தேர்தலுக்குப் பிறகு தமிழகத்தில் ஆட்சி மாற்றம் ஏற்படும் என்றும், தூத்துக்குடி மாவட்டம் விளாத்திகுளம் பகுதியில் உயிரிழந்த 12ஆம் வகுப்பு மாணவி வழக்கில் உரிய நீதி கிடைக்கும் என்றும் தமிழக பாஜ தலைவர் நயினார் நாகேந்திரன் தெரிவித்தார்.
தனது அறிக்கையில், பாதிக்கப்பட்ட குடும்பத்தினரை நேரில் சந்தித்து ஆறுதல் கூறியதாகவும், உயிரிழந்த மாணவியின் சகோதரியின் கல்விக்காக பாஜ சார்பில் நிதியுதவி வழங்கப்பட்டதாகவும் கூறினார்.
திமுக ஆட்சியில் சட்டம்-ஒழுங்கு சீர்குலைந்துள்ளதாகவும், அந்த குடும்பத்தின் துயரம் தன்னை ஆழமாக பாதித்துள்ளதாகவும் அவர் தெரிவித்தார்.
மேலும், சம்பவம் நடந்த பல நாட்கள் கடந்தும், மக்கள் நீதிக்காக போராட்டத்தில் ஈடுபட்ட பின்னரும், இந்த வழக்கில் இன்னும் ஒருவர்கூட குற்றவாளியாக கண்டறியப்படவில்லை என அவர் குற்றம்சாட்டினார். தேர்தலுக்குப் பின் ஆட்சி மாற்றம் ஏற்பட்டு, மாணவிக்கு நீதி கிடைக்கும் எனவும் அவர் மீண்டும் வலியுறுத்தினார்.
