மதுரை: தமிழக நெடுஞ்சாலைத்துறையில் கட்டுமானம் மற்றும் பராமரிப்பு, திட்டங்கள், பாலங்கள், தரக்கட்டுப்பாடு, தேசிய நெடுஞ்சாலை, கிராமச்சாலைகள் (நபார்டு) மற்றும் நெடுஞ்சாலை ஆராய்ச்சி மையம் உள்ளிட்ட பல பிரிவுகள் செயல்பட்டு வருகின்றன. இவை மாநில அளவில் ஒரே தலைமைப் பொறியாளரின் கீழ் இயங்கி வருகின்றன.
இந்தத் துறையில் சுமார் 10 ஆயிரம் சாலைப் பணியாளர்கள் மற்றும் 8 ஆயிரம் பிற ஊழியர்கள், அலுவலர்கள் பணியாற்றுகின்றனர். மறுசீரமைப்பு என்ற பெயரில் துறையின் பெரும்பாலான பிரிவுகளை ஒரே பிரிவுக்குள் கொண்டு வர மார்ச் 13 அன்று அரசாணை வெளியிடப்பட்டதாக தெரிவிக்கப்பட்டுள்ளது. தரக்கட்டுப்பாடு மற்றும் ஆராய்ச்சி மையம் மட்டும் தனியாக வைத்துக் கொள்ளப்பட்டுள்ளதாக கூறப்படுகிறது.
கடந்த ஐந்து ஆண்டுகளாக எந்த முன்அறிகுறியும் இல்லாமல், ஆட்சி முடிவுக்கு நெருங்கும் நேரத்தில் இந்த உத்தரவு வந்துள்ளதாக ஊழியர்கள் தரப்பில் கவலை வெளியிடப்படுகிறது. இதனால் நிர்வாக அமைப்பில் பெரிய மாற்றங்கள் ஏற்படலாம் என அவர்கள் கூறுகின்றனர்.
திட்டத்தின் படி, சென்னை தலைமைப் பொறியாளர் பதவியைப் போல மதுரை, கோவை, திருச்சியிலும் தலைமைப் பொறியாளர் பணியிடங்கள் உருவாக்கப்படலாம். மேலும் மாவட்டங்களில் பணியாற்றும் பலர் இடமாற்றத்திற்கு ஆளாகலாம் என்ற அச்சம் காரணமாக துறையில் அதிருப்தி நிலவுகிறது.
