வரும் தமிழ்நாடு சட்டசபை தேர்தலில் போட்டியிடுவதற்காக, தேசிய ஜனநாயகக் கூட்டணி (தேஜ) சார்பில் தங்களுக்கு தொகுதி ஒதுக்கீடு வழங்க வேண்டும் என இந்து மக்கள் கட்சி வலியுறுத்தியுள்ளது. இந்த கோரிக்கையை மத்திய அமைச்சர் அமித்ஷா மற்றும் அதிமுக பொதுச்செயலாளர் எடப்பாடி கே. பழனிசாமி (இபிஎஸ்) ஆகியோரிடம் தெரிவித்துள்ளதாக கட்சி கூறியுள்ளது.
இந்த கோரிக்கை சென்னையில் நடைபெற்ற கட்சியின் “தமிழகம் மீட்பு மாநாடு” மூலம் முன்வைக்கப்பட்டது. “திராவிட மாடல்” ஆட்சியை வீழ்த்த வேண்டும் என்ற கோரிக்கையை மையமாகக் கொண்டு நடந்த இந்த நிகழ்வில், 234 சட்டசபை தொகுதிகளுக்கான கட்சி பொறுப்பாளர்கள் மற்றும் மாநில, மாவட்ட நிர்வாகிகள் கலந்து கொண்டனர்.
மாநாட்டில், தேஜ கூட்டணியில் இணைந்து ஐந்து சட்டசபை தொகுதிகளில் போட்டியிட வாய்ப்பு கோரும் தீர்மானம் நிறைவேற்றப்பட்டது. தனிச் சின்னத்தில் அல்லது அதிமுகவின் ‘இரட்டை இலை’ அல்லது பாஜகவின் ‘தாமரை’ சின்னத்தில் போட்டியிட அனுமதி வழங்க வேண்டும் என்றும் கட்சி தெரிவித்தது.
தேஜ கூட்டணியில் பல ஆண்டுகளாக சித்தாந்த மற்றும் அமைப்பு ரீதியாக ஆதரவாளராக இருந்து வருவதாகவும், மாநிலம் முழுவதும் அடிமட்டத்தில் தேசியவாத மற்றும் கலாசார விழுமியங்களை வலுப்படுத்த தொடர்ந்து பணியாற்றி வருவதாகவும் கட்சி கூறியது. மேலும், பாஜ மற்றும் அதிமுக தலைமைகளுக்கு அனுப்பிய கடிதத்தில், கட்சித் தலைவர் அர்ஜுன் சம்பத்துக்கு தேர்தலில் போட்டியிட குறைந்தது ஒரு தொகுதியை ஒதுக்கீடு செய்ய வேண்டும் என நிர்வாகிகள் கோரிக்கை விடுத்துள்ளனர்.
