கோவை: கோவை மாவட்டத்தில் உள்ள 10 சட்டசபை தொகுதிகளில், கூட்டணி கட்சிகள் 6 தொகுதிகளை கோருவதால் தி.மு.க. நிர்வாகிகள் அதிருப்தி தெரிவித்துள்ளனர். அதே நேரத்தில், கூட்டணிக்கு அதிக தொகுதிகள் ஒதுக்கப்பட்டால் எதிர்பார்த்த அளவுக்கு வெற்றி வாய்ப்பு இருக்காது என உளவுத்துறை அறிக்கை சுட்டிக்காட்டியதாக கூறப்படுவதால், கட்சியினர் ஓரளவு ஆறுதல் அடைந்துள்ளனர்.
கடந்த தேர்தலில் கோவை மாவட்டத்தின் 10 தொகுதிகளிலும் தி.மு.க. வெற்றி பெறவில்லை. இம்முறை அனைத்து தொகுதிகளிலும் வெற்றி பெற வேண்டும் என்ற இலக்குடன் கட்சி களமிறங்கியுள்ளது. கொங்கு மண்டலத்தில் தேர்தல் வியூகப் பணிகளை செந்தில் பாலாஜி முன்னெடுத்து வருவதாகவும், அவருக்கு 39 தொகுதிகள் பொறுப்பு வழங்கப்பட்டுள்ளதாகவும் தகவல்.
இந்நிலையில், மா.கம்யூ., இ.கம்யூ., காங்கிரஸ், மக்கள் நீதி மய்யம், கொ.ம.தே.க., தே.மு.தி.க. உள்ளிட்ட கூட்டணி கட்சிகள் கோவை மாவட்டத்தில் போட்டியிட ஆர்வம் காட்டுகின்றன. ஆனால் 10-இல் 6 தொகுதிகள் வரை கூட்டணிக்கே ஒதுக்க வேண்டிய நிலை வந்தால், கூட்டணியின் மொத்த வெற்றி வாய்ப்பு பாதிக்கலாம் என தி.மு.க. தரப்பில் கவலை தெரிவிக்கப்பட்டதாக கூறப்படுகிறது.
சில தொகுதிகளை எடுத்துக்காட்டி நிர்வாகிகள் தங்கள் சந்தேகங்களை முன்வைத்துள்ளனர். கோவை தெற்கு தொகுதியில் காங்கிரஸ் முன்பு இரண்டு முறை போட்டியிட்டு தோற்றதாகவும், அதே தொகுதியை ம.நீ.ம.வும் கேட்பதாகவும் அவர்கள் கூறினர். கடந்த முறை கமல் ஹாசன் போட்டியிட்டபோது கிடைத்த வாக்குகளை அவரது கட்சி வேட்பாளர் பெறுவாரா என்ற கேள்வியும் எழுப்பப்பட்டுள்ளது. சிங்காநல்லூரில் வாக்குப் பிரிவு காரணமாக தி.மு.க. பாதிக்கப்பட்டதாகவும், லோக்சபா தேர்தலில் அண்ணாமலை கணிசமான வாக்குகள் பெற்றதாகவும் நினைவூட்டினர்.
மேலும், தொண்டாமுத்தூரில் வேலுமணியை எதிர்கொள்ள வலுவான வேட்பாளர் தேவை என்பதால் தி.மு.க. நேரடியாக போட்டியிட வேண்டும் எனவும் அவர்கள் வலியுறுத்தினர். கூட்டணி கட்சிகளுக்கு சில பகுதிகளில் போதிய உள்ளூர் பலம் இல்லை; தி.மு.க. பணியாளர்களே அமைப்புப் பணியும் செலவுகளும் மேற்கொள்ள வேண்டிய நிலை வரும்; கூட்டணிக் கட்சிகள் ஒருங்கிணைந்து செயல்படாவிட்டால் வெற்றி பாதிக்கலாம் என உளவுத்துறை மதிப்பீட்டை கட்சி தலைமை கவனிக்க வேண்டும் என்றும் அவர்கள் தெரிவித்ததாக கூறப்படுகிறது.
