புதுடில்லி: பார்லிமென்டுக்கு வரும் எம்.பி.க்கள் பொதுவாக ஒழுங்கான உடையணிவுடன் வருவது வழக்கம். அதிலும் பெண் எம்.பி.க்களின் உடைத் தேர்வுகள் அதிக கவனம் பெறுகின்றன. லோக்சபாவில் 74, ராஜ்யசபாவில் 42 என மொத்தம் 116 பெண் எம்.பி.க்கள் உள்ள நிலையில், பலர் புடவையிலேயே வருகிறார்கள்.
நடந்து வரும் பட்ஜெட் கூட்டத்தொடரில் அழகாக உடையணிந்து வருபவர்களில் முன்னிலையில் நடிகையும் பா.ஜ. எம்.பி.யுமான கங்கனா ரணாவத் இருப்பதாக கூறப்படுகிறது. காலை, மாலை என வேறு வேறு புடவைகள் அணிவதோடு, ஒருமுறை கட்டிய புடவையை மீண்டும் பயன்படுத்துவதில்லை என்றும் தகவல் வெளியாகியுள்ளது.
சக எம்.பி.க்கள் அவரது உடைத் தேர்வுகளை பாராட்டி வருவதாகவும், திரிணமுல் காங்கிரஸ் எம்.பி. மஹுவா மொய்த்ராவும் போட்டியாகச் சீரான உடையணிவுடன் வருவதாகவும் குறிப்பிடப்படுகிறது. இதேபோல் தமிழ்நாட்டைச் சேர்ந்த கனிமொழி, தமிழச்சி தங்க பாண்டியன் ஆகியோரின் புடவைகளும் பெண் எம்.பி.க்களிடையே பாராட்டைப் பெற்றுள்ளதாக சொல்லப்படுகிறது.
மேலும் பா.ஜ. எம்.பி. ஹேமமாலினியும் வண்ணமயமான புடவைகளில் வருவதாக குறிப்பிடப்பட்டுள்ளது. பார்லிமென்ட் செய்தி சேகரிக்கும் இளம் பெண் நிருபர்கள் கங்கனாவிடம் புடவைகள் எங்கு வாங்கப்பட்டன என்று கேட்பதாகவும், ஹிந்தி சேனல்களில் அவரது புடவைகள் குறித்து செய்தி பகுதிகள் வரத் தொடங்கியதாகவும் தகவல் தெரிவிக்கிறது.
இந்த பரபரப்பை பார்த்த சபாநாயகர் ஓம் பிர்லா, பார்லிமென்டில் ‘பேஷன் ஷோ’ நடத்தலாம் போலிருக்கிறது எனக் கூறியதாகவும் கூறப்படுகிறது.
