திமுக தலைமையிலான கூட்டணியில் இருந்து தமிழக வாழ்வுரிமை கட்சி (தவாக) விலகுவதாக கட்சித் தலைவர் வேல்முருகன் சனிக்கிழமை அறிவித்தார். இது தேர்தல் சூழலில் கூட்டணிக்கு மேலும் அழுத்தத்தை ஏற்படுத்தும் எனக் கூறப்படுகிறது.
பண்ருட்டி தொகுதியில் பா.ம.க. சார்பில் போட்டியிட்டு இரண்டு முறை எம்.எல்.ஏ.வாக இருந்த வேல்முருகன், பின்னர் அந்தக் கட்சியில் இருந்து விலகி தமிழக வாழ்வுரிமை கட்சியை தொடங்கினார். கடந்த தேர்தலில் திமுக கூட்டணியில் போட்டியிட்டு பண்ருட்டியில் வெற்றி பெற்றார்.
கூட்டணியில் இருந்தபோதும் சட்டசபையில் அமைச்சர்கள் மற்றும் சபாநாயகருடன் அடிக்கடி வாக்குவாதம் செய்ததாகவும், இதனால் திமுக தரப்பில் அவர்மீது அதிருப்தி இருந்ததாகவும் செய்தி கூறுகிறது. இந்நிலையில் இந்தத் தேர்தலில் கட்சிக்கு கூடுதல் தொகுதிகள் வேண்டும் என அவர் ஆரம்பம் முதலே வலியுறுத்திய நிலையில், திமுக அதை ஏற்கவில்லை என்றும் குறிப்பிடப்பட்டுள்ளது.
நிருபர்களிடம் பேசிய வேல்முருகன், தமது கோரிக்கையை திமுக பொருட்படுத்தவில்லை என்றும், திமுகவிடம் 10 கோரிக்கைகளை முன்வைத்ததாகவும் தெரிவித்தார். மேலும், தன்னை கூட்டணியில் இருந்து வெளியேற்ற அரசு அதிகாரிகளே கூறியதாகவும், சமூகநீதிக்கு எதிரான சக்திகளை திமுக உடன் வைத்துள்ளதாகவும் குற்றம்சாட்டினார்.
வடக்கு மற்றும் வடமேற்கு மாவட்டங்களில் தவாகக்கு கணிசமான ஓட்டு வங்கி இருப்பதாக கூறிய அவர், அடுத்தகட்ட நடவடிக்கை குறித்து கட்சி நிர்வாகிகளுடன் ஆலோசித்து முடிவு எடுக்கப்படும் என்றார். கோரிக்கைகளை நிறைவேற்றும் கட்சிகளுடன் கூட்டணி அமைப்போம் என்றும், கடந்த ஐந்து ஆண்டுகள் வாய்ப்பு அளித்த முதல்வர் மு.க. ஸ்டாலின் மற்றும் கூட்டணி கட்சி தலைவர்களுக்கு நன்றி தெரிவித்தார்.
