தஞ்சாவூர் மாவட்டம் பாபநாசம் சட்டசபை தொகுதியை வரவிருக்கும் தேர்தலில் திமுகவுக்கே ஒதுக்கி, கட்சி நேரடியாக வேட்பாளரை நிறுத்த வேண்டும் என்று திமுக நிர்வாகிகள் மற்றும் தொண்டர்கள் கட்சித் தலைமையிடம் வலியுறுத்தியுள்ளனர். பல ஆண்டுகளாக இந்த தொகுதியில் திமுக நேரடி வெற்றி பெறவில்லை என்பதே அவர்களின் முக்கிய காரணமாக உள்ளது.
2021 சட்டசபை தேர்தலில் திமுக கூட்டணியில் உள்ள மனிதநேய மக்கள் கட்சி தலைவர் ஜவாஹிருல்லா, திமுகவின் ‘உதயசூரியன்’ சின்னத்தில் பாபநாசத்தில் போட்டியிட்டு வெற்றி பெற்றார். இத்தேர்தலிலும் அதே தொகுதியை அவர் கேட்டு வருவதாகவும், ஆனால் இம்முறை திமுகவே போட்டியிட வேண்டும் என்று உள்ளூர் கட்சியினர் கருத்து தெரிவித்து வருவதாகவும் கூறப்படுகிறது.
கட்சியினர் கூறுவதன்படி, 1952 முதல் 1967 வரை காங்கிரஸ் வெற்றி பெற்றது. 1971 தேர்தலில் மட்டும் திமுக சார்பில் கணபதி என்பவர் வெற்றி பெற்றார். அதன் பின்னர் 1977 முதல் 1991 வரை மீண்டும் காங்கிரஸ் வென்றதாகவும், 1989ல் மறைந்த ஜி.கே. மூப்பனார் வெற்றி பெற்றதாகவும் அவர்கள் நினைவூட்டினர்; 1996 மற்றும் 2001ல் த.மா.கா. வெற்றி பெற்றதாகவும் தெரிவித்தனர்.
மேலும் 2006, 2011, 2016 தேர்தல்களில் திமுக கூட்டணியில் காங்கிரசுக்கு தொகுதி ஒதுக்கப்பட்ட நிலையில் அ.தி.மு.க. வெற்றி பெற்றதாகவும், 2021ல் உதயசூரியன் சின்னம் வென்றாலும் வேட்பாளர் திமுகவைச் சேர்ந்தவர் அல்ல என்றும் அவர்கள் கூறினர். எனவே 1971க்கு பிறகு 55 ஆண்டுகளாக திமுக வேட்பாளர் நேரடியாக வென்றதில்லை என்பதால், இம்முறை பாபநாசம் தொகுதியை திமுகவுக்கே ஒதுக்க வேண்டும் என்று தலைமையிடம் கோரிக்கை விடுத்துள்ளதாக தெரிவித்தனர்.
