வார வர்த்தகத்தின் முதல் நாளில் இந்திய பங்குச்சந்தைகள் கடும் விற்பனை அழுத்தத்தை சந்தித்தன. வர்த்தகம் தொடங்கிய முதல் மணிநேரத்திலேயே முக்கிய குறியீடுகள் கணிசமாக சரிந்தன.
மும்பை பங்குச்சந்தை சென்செக்ஸ் சுமார் 1,900 புள்ளிகள் சரிந்து 72,628 ஆகவும், தேசிய பங்குச்சந்தை நிப்டி சுமார் 600 புள்ளிகள் சரிந்து 22,504 ஆகவும் வந்தது. இதனால், சுமார் ஒரு மணிநேரத்தில் முதலீட்டாளர்களுக்கு ரூ.14 லட்சம் கோடி இழப்பு ஏற்பட்டதாக தெரிவிக்கப்பட்டது.
இதன் தாக்கமாக, பிஎஸ்இ-யில் பட்டியலிடப்பட்ட நிறுவனங்களின் மொத்த சந்தை மதிப்பு ரூ.429 லட்சம் கோடியிலிருந்து ரூ.415 லட்சம் கோடியாக குறைந்தது.
வெளிநாட்டு முதலீட்டாளர்களின் வெளியேற்றமும் தொடர்கிறது. மார்ச் மாதத்தில் இதுவரை சுமார் ரூ.90,152 கோடி மதிப்பிலான பங்குகளை அவர்கள் விற்றுள்ளதாக கூறப்படுகிறது.
அமெரிக்கா–ஈரான் போர் தீவிரம், கச்சா எண்ணெய் விலை உயர்வு, முதலீட்டாளர்களிடையே அதிகரித்த அச்சம், வெளிநாட்டு முதலீட்டாளர்கள் வெளியேற்றம் மற்றும் உலக சந்தைகளின் பாதிப்பு போன்ற காரணங்கள் இந்த சரிவுக்கு காரணமாக இருக்கலாம் என வல்லுநர்கள் குறிப்பிடுகின்றனர்.
