மேற்காசியப் பிராந்தியத்தில் அதிகரித்துள்ள போர் பதற்றம் மற்றும் அதன் இந்தியாவுக்கான தாக்கங்கள் குறித்து ஆலோசிக்க, மத்திய அரசு இன்று மாலை டில்லியில் அனைத்து கட்சி கூட்டத்தை கூட்டியுள்ளது.
செய்தி விவரப்படி, பிப். 28 முதல் அமெரிக்கா மற்றும் இஸ்ரேல் இணைந்து ஈரான் மீது தாக்குதல் நடத்தி வருவதால் மோதல் தீவிரமடைந்துள்ளது. இதற்கு ஈரானும் பதிலடி கொடுத்து வருவதால், பிராந்திய நிலைமை மேலும் பதற்றமாகியுள்ளது.
அமெரிக்க தாக்குதலால் கடுப்படைந்த ஈரான், உலகின் கச்சா எண்ணெய் போக்குவரத்தின் சுமார் 20% நடைபெறும் ஹார்முஸ் ஜலசந்தியை மூடியதாக கூறப்படுகிறது. இதனால் இந்தியாவையும் சேர்த்து உலகளவில் கச்சா எண்ணெய், எரிவாயு விநியோகத்தில் தட்டுப்பாடு ஏற்படும் என்ற அச்சம் எழுந்துள்ளது. இதுகுறித்து விவாதிக்க அனைத்து கட்சி கூட்டம் நடத்த வேண்டும் என எதிர்க்கட்சிகள் வலியுறுத்தி வந்தன.
இன்று மாலை 5 மணிக்கு நடைபெறும் கூட்டத்தில் காங்கிரஸ் உள்ளிட்ட எதிர்க்கட்சிகளுக்கு அழைப்பு விடுக்கப்பட்டுள்ளது. கூட்டத்திற்கு பாதுகாப்புத் துறை அமைச்சர் ராஜ்நாத் சிங் தலைமை வகிக்கிறார்; வெளியுறவு அமைச்சர் எஸ். ஜெய்சங்கர், பார்லிமென்ட் விவகார அமைச்சர் கிரண் ரிஜிஜு உள்ளிட்டோர் பங்கேற்க உள்ளனர்.
கூட்டத்தில் மேற்காசிய போர் சூழல், அங்குள்ள இந்தியர்களின் பாதுகாப்பு, அரசு எடுத்துள்ள நடவடிக்கைகள், கச்சா எண்ணெய் மற்றும் சமையல் எரிவாயு கையிருப்பு நிலை ஆகியவற்றை மத்திய அரசு விளக்க உள்ளது. இதற்கிடையே, ராஜ்யசபாவில் பிரதமர் நரேந்திர மோடி பேசுகையில், எரிசக்தி விநியோகத்தை பல்வேறு நாடுகளிலிருந்து உறுதி செய்ய நடவடிக்கைகள் மேற்கொள்ளப்படுவதாகவும், சமீப நாட்களில் கப்பல்கள் வந்துள்ளதுடன் மேலும் வரவுள்ளதாகவும் தெரிவித்தார்; மேலும் விநியோகத் தொடர், எரிபொருள், உரங்கள், எரிவாயு, பணவீக்கம் உள்ளிட்ட தாக்கங்களை கையாள ஏழு புதிய அதிகார குழுக்கள் அமைக்கப்பட்டுள்ளதாகவும் கூறினார்.
