வாஷிங்டனில் இருந்து வெளியாகிய தகவல்களின்படி, மேற்காசியாவில் உள்ள பல அமெரிக்க ராணுவத் தளங்கள் மீது ஈரான் நடத்திய ஏவுகணை மற்றும் ட்ரோன் தாக்குதல்களால் கடுமையான சேதம் ஏற்பட்டுள்ளது. சில தளங்கள் பயன்படுத்த முடியாத நிலைக்கு சென்றதாகவும் கூறப்படுகிறது.
இந்த தாக்குதல்கள், பிப். 28 அன்று அமெரிக்கா மற்றும் இஸ்ரேல் இணைந்து ஈரான் மீது தொடங்கியதாக கூறப்படும் போரின் பின்னணியில், ஈரான் மேற்கொண்ட பதிலடி நடவடிக்கையாக விவரிக்கப்படுகிறது. இஸ்ரேல் மற்றும் பிராந்தியத்தில் உள்ள அமெரிக்க தளங்களை இலக்காக வைத்து ஈரான் ஏவுகணைகள், ட்ரோன்கள் மூலம் தாக்குதல் நடத்தி வருவதாக தகவல்கள் தெரிவிக்கின்றன.
இந்த தொடர்தாக்குதல்களால் மேற்காசியாவில் 13 அமெரிக்க தளங்கள் பாதிக்கப்பட்டுள்ளதாக கூறப்படுகிறது. விமானப்படை நடவடிக்கைகள் தொடர்ந்தாலும், தரைப்படையினர் ஹோட்டல்கள் உள்ளிட்ட தற்காலிக இடங்களுக்கு மாற்றப்பட்டதாகவும், சில பணியாளர்கள் ஐரோப்பிய நாடுகளுக்கு இடமாற்றம் செய்யப்பட்டதாகவும் தகவல்கள் குறிப்பிடுகின்றன.
அமெரிக்க அதிகாரிகள் மற்றும் ராணுவ வீரர்கள் கூறியதாக வெளியான தகவல்களில், குவைத்தில் உள்ள தளங்கள் மிக மோசமாக பாதிக்கப்பட்டதாக தெரிவிக்கப்பட்டுள்ளது. போர்ட் ஷுவைபா, அலி அல் சலேம் விமானப்படை தளம், கேம்ப் புஹ்ரிங் ஆகியவை தாக்குதலில் சேதமடைந்ததாக குறிப்பிடப்பட்டுள்ளது.
மேலும், போர் தொடங்கி ஒரு மாதத்திற்குள் அமெரிக்கா 16 விமானங்களை இழந்ததாகவும், அதில் 12 எம்.க்யூ-9 ட்ரோன்கள் அடங்கும் எனவும் தகவல்கள் கூறுகின்றன. குவைத் வான்பாதுகாப்பு அமைப்பால் தவறுதலாக 3 எப்-15 விமானங்கள் சுடப்பட்டதாகவும், ஈராக் வான்வெளியில் கே.சி-135 எரிபொருள் நிரப்பும் விமானங்கள் மோதியதில் 6 பேர் உயிரிழந்ததாகவும், கத்தார் மற்றும் ஜோர்டானில் உள்ள முக்கிய ரேடார்கள் ஈரான் தாக்குதலில் அழிந்ததாகவும் தெரிவிக்கப்பட்டுள்ளது.
