புதுடில்லி: சட்டசபை தேர்தல் நடத்தை விதிமுறைகள் அமலில் உள்ள மாநிலங்களைத் தவிர, பிற மாநிலங்கள் மற்றும் யூனியன் பிரதேச முதல்வர்களுடன் பிரதமர் நரேந்திர மோடி இன்று வீடியோ கான்பரன்ஸ் மூலம் ஆலோசனை நடத்த உள்ளார்.
மேற்காசிய பிராந்தியத்தில் நிலவும் போர் பதற்றத்தின் பின்னணியில், எரிபொருள் விநியோகத்தில் ஏற்படக்கூடிய நெருக்கடி மற்றும் அதற்கான தயார்நிலை குறித்து இந்த ஆலோசனையில் பேசப்பட உள்ளது. இதனால் இந்தியாவில் கச்சா எண்ணெய் மற்றும் இயற்கை எரிவாயு தட்டுப்பாடு ஏற்படுமோ என்ற அச்சமும் குறிப்பிடப்படுகிறது.
அமெரிக்கா மற்றும் இஸ்ரேல் தரப்பின் தாக்குதல்களுக்கு பதிலடியாக, சவுதி அரேபியா, ஐக்கிய அரபு எமிரேட்ஸ் உள்ளிட்ட வளைகுடா நாடுகளில் உள்ள அமெரிக்க நிலைகளைக் குறிவைத்து ஈரான் தாக்குதலை தீவிரப்படுத்தியதாக செய்தி கூறுகிறது.
இந்த சூழலை சமாளிப்பது தொடர்பாக மத்திய அரசு சமீபத்தில் அனைத்துக் கட்சி கூட்டம் நடத்தியதாகவும், இதில் ஒருமித்த நிலைப்பாட்டை வெளிப்படுத்த முடிவு செய்யப்பட்டதாகவும் தெரிவிக்கப்பட்டுள்ளது. இன்றைய ஆலோசனையில் மத்திய அரசு எடுத்துள்ள நடவடிக்கைகள், மாநில அரசுகள் மேற்கொள்ள உள்ள நடவடிக்கைகள் ஆகியவை விவாதிக்கப்பட உள்ளன.
மேலும் மாநிலங்களின் தயார்நிலை மற்றும் செயல்திட்டங்களை ஆய்வு செய்வதற்கும் இந்த பேச்சுவார்த்தை பயன்படும் என மத்திய அரசு வட்டாரங்கள் கூறுகின்றன. தேர்தல் நடத்தை விதிமுறைகள் காரணமாக தமிழ்நாடு, கேரளா, மேற்கு வங்கம், அசாம் மற்றும் புதுச்சேரி முதல்வர்கள் பங்கேற்க வாய்ப்பில்லை; அவர்களது தலைமைச் செயலர்களுடன் அமைச்சரவை செயலகம் தனியாக கூட்டம் நடத்த திட்டமிட்டுள்ளதாகவும் தெரிவிக்கப்பட்டுள்ளது.
