வரவிருக்கும் தமிழக சட்டசபை தேர்தலில், தங்கள் வெற்றியை விட தி.மு.க. தோல்வியே முக்கியம் என்ற அணுகுமுறையில் பா.ஜ.க. தலைமையகம் இருப்பதாக அந்த அறிக்கை கூறுகிறது. ‘இண்டியா’ கூட்டணியில் காங்கிரசுக்கு அடுத்த முக்கியக் கட்சியாக தி.மு.க. இருப்பதே இதற்கான காரணமாகவும் அதில் குறிப்பிடப்பட்டுள்ளது.
அறிக்கையின் படி, பா.ஜ.க. மூன்று முக்கிய இலக்குகளை முன்கூட்டியே நிர்ணயித்ததாக கூறப்படுகிறது: பிரமாண்ட கூட்டணி அமைத்தல், வாய்ப்பிருந்தால் தி.மு.க. கூட்டணியை உடைத்தல், மற்றும் தி.மு.க.யின் பண பலத்தை எதிர்கொள்ளத் தயாராகுதல். இதை மனதில் வைத்து 2025 ஜனவரியிலேயே தேர்தல் பணிகளை தொடங்கியதாகவும் தெரிவிக்கிறது.
ஏப்ரலில் அ.தி.மு.க.வுடன் கூட்டணி அமைத்த பின், தி.மு.க.வை எதிர்கொள்ள சட்ட ரீதியான ஆதரவு மட்டுமல்லாமல் நிதி உதவியும் வழங்குவதாக பா.ஜ.க. தெரிவித்ததாக அறிக்கை கூறுகிறது. அதற்குப் பதிலாக, கூட்டணியை விரிவுபடுத்தும் முயற்சிகளை அ.தி.மு.க. முன்னெடுக்க வேண்டும் என்றும், குறிப்பாக தே.மு.தி.க. வெளியே இருந்தால் ‘எலக்ஷன் ஸ்பாயிலர்’ ஆக மாறலாம் என்ற கணிப்பின் அடிப்படையில் அவர்களை கூட்டணிக்குள் கொண்டு வர வேண்டும் என்றும் கூறப்படுகிறது.
மேலும், பல தவணைகளாக பெரிய தொகை தமிழகத்திற்கு வந்ததாகவும், அந்த நிதியை வைத்து சுமார் 150 தொகுதிகளில் வாக்குகளை கவர முடியும் என்ற கணக்கு அ.தி.மு.க. அனுபவஸ்தர்களிடம் இருந்ததாகவும் அறிக்கை தெரிவிக்கிறது. ஆனால் தே.மு.தி.க. கோரிக்கைகளில் பழனிசாமி கறாராக இருந்ததால், பிரேமலதா தி.மு.க. தரப்பை விரும்பியதாகவும், ஆண்டாள் அழகர் கல்லூரி விவகாரத்தை முடித்து வைப்பதும் தேர்தல் செலவுகளை ஏற்கவும் தி.மு.க. ஒப்புக்கொண்டதாகவும் அதில் கூறப்பட்டுள்ளது.
அறிக்கையில் மேற்கோளிடப்பட்ட பா.ஜ.க. தரப்பு, தமிழகத்தில் கட்டமைப்பு அ.தி.மு.க.விடமே இருப்பதால் தேர்தல் செலவினங்களை செயல்படுத்தும் பொறுப்பை அவர்களிடம் ஒப்படைக்க வேண்டிய நிலை ஏற்பட்டதாக கூறுகிறது. கடந்த தேர்தலில் நிதி கீழ்மட்ட தொண்டர்களிடம் சென்று சேரவில்லை என்ற அனுபவமும் இதற்கு காரணமாக குறிப்பிடப்படுகிறது. இதற்கிடையே, தேர்தல் செலவுக்கென வைத்துக்கொள்ளலாம் என்று டில்லியை சமாதானப்படுத்திய பழனிசாமி, தற்போது அதற்கும் தயங்குகிறார் என அ.தி.மு.க.வினர் புலம்புவதாகவும் அறிக்கை கூறுகிறது.
