கோவில் நிலங்கள் தனியார் கைக்கு மாறும் அபாயம் இருப்பதாக எழுந்த குற்றச்சாட்டுகளுக்கிடையில், 2025 செப். 9 அன்று வெளியிடப்பட்ட அரசாணையை தமிழக வருவாய் துறை திரும்பப் பெற்றுள்ளது. இது தொடர்பாக சென்னை உயர் நீதிமன்றத்தின் மதுரை கிளையில் வழக்கு தொடரப்பட்ட நிலையில், நீதிமன்ற விசாரணை முன்னேறிய பின்னணியில் இந்த முடிவு எடுக்கப்பட்டதாக தெரிவிக்கப்பட்டுள்ளது.
தமிழகத்தில் கோவில்கள், மடங்கள் உள்ளிட்ட அமைப்புகளுக்கு தானமாக வழங்கப்பட்ட ஆயிரக்கணக்கான ஏக்கர் நிலங்களுக்கு உரிய ஆவணங்கள் உள்ளதாக கூறப்படுகிறது. ஆனால் அவற்றில் பல நிலங்கள் தனியாரால் ஆக்கிரமிக்கப்பட்டுள்ளதாகவும், அவற்றை மீட்க ஹிந்து சமய அறநிலையத் துறை சட்டப்படி நடவடிக்கை எடுத்து வருவதாகவும் தகவல் வெளியாகியுள்ளது.
இந்நிலையில், கோவில் பெயரில் நீண்ட காலமாக உள்ள நிலங்களுக்கு சிலர் பட்டா விவரங்களை முன்வைத்து உரிமை கோரி, வருவாய் துறையில் மேல்முறையீடுகள் தாக்கல் செய்வதாக கூறப்படுகிறது. இவ்வாறு வரும் மேல்முறையீடுகளை விசாரிக்க, ரயத்துவாரி பட்டா நிலங்கள் தொடர்பான தமிழக மைனர் இனாம் சட்டத்தின் கீழ் எழும் பிரச்னைகளை தீர்க்க, தலைமை செயலர் தலைமையில் உயர்நிலை குழு அமைக்கப்படும் என அந்த அரசாணையில் குறிப்பிடப்பட்டிருந்தது. இதில் வருவாய் துறை செயலர் உள்ளிட்ட ஆறு பேர் உறுப்பினர்களாக இருப்பர் என்றும், எந்த நிலங்களுக்கு பத்திரப்பதிவு தடை விதிக்க வேண்டும் அல்லது தடையை விடுவிக்க வேண்டும் என்பதை குழு முடிவு செய்யும் என்றும் கூறப்பட்டிருந்தது.
சமூக ஆர்வலர்கள் கூறுகையில், கோவில்களுக்கு சொந்தமான நிலங்களுக்கு பதிவுத்துறை இணையதளத்தில் வழிகாட்டி மதிப்பு பூஜ்ஜியமாக காட்டப்படுவதுடன், வருவாய் பதிவுகளில் அந்த சர்வே எண்கள் “T” என்ற எழுத்தால் அடையாளப்படுத்தப்பட்டுள்ளதாக தெரிவித்தனர். தவறான தகவல்களை அடிப்படையாக கொண்டு பதிவு தடையை நீக்கும் முடிவுகள் எடுக்கப்பட்டால், அதிகாரிகளின் துணையுடன் கோவில் நிலங்கள் அபகரிக்கப்படும் சூழல் உருவாகலாம் என அவர்கள் எச்சரித்தனர்.
இந்த விவகாரத்தில் தாக்கல் செய்யப்பட்ட மனுவை நீதிமன்றம் விசாரித்ததையடுத்து, வருவாய் துறை அந்த அரசாணையை ரத்து செய்வதாக தெரிவித்ததாக கூறப்படுகிறது. பட்டா தொடர்பான மேல்முறையீடுகளை விசாரிக்க ஏற்கனவே அமைப்புகள் உள்ள நிலையில், புதிய உயர்நிலை குழு ஏன் முன்மொழியப்பட்டது என்ற கேள்வியையும் சமூக ஆர்வலர்கள் எழுப்பினர்.
