நாட்டின் முதல் முழுமையான டிஜிட்டல் மக்கள் தொகை கணக்கெடுப்பு நாளை முதல் தொடங்குகிறது. இது ஆன்லைன் சுய பதிவு மற்றும் கணக்கெடுப்பாளர் வீடு தேடி வரும் நேரடி கணக்கெடுப்பு என இரு முறைகளையும் இணைத்து, இரு கட்டங்களாக நடத்தப்படுகிறது.
10 ஆண்டுகளுக்கு ஒருமுறை நடைபெறும் இந்த கணக்கெடுப்பு, 2021ல் நடத்த திட்டமிடப்பட்டிருந்தாலும் கொரோனா காரணமாக ஒத்திவைக்கப்பட்டது. இதன் தொடர்ச்சியாக, சுதந்திரத்திற்கு பின் எட்டாவது முறையாக இப்போது கணக்கெடுப்பு தொடங்குகிறது.
தலைமை பதிவாளர் மற்றும் மக்கள் தொகை கணக்கெடுப்பு கமிஷனர் மிருத்யுஞ்ஜய் குமார் நாராயணன் கூறியதன்படி, பொதுமக்கள் தங்களைப் பற்றிய தகவல்களை அவர்களே இணையதளம் மூலம் பதிவு செய்யும் “சுய விபரம்” வசதி இந்த முறை அறிமுகப்படுத்தப்பட்டுள்ளது. தமிழ் உள்ளிட்ட 16 மொழிகளில் பிரத்யேக இணையதளம் உருவாக்கப்பட்டுள்ளதாகவும், ஆன்லைனில் பதிவு செய்வோருக்கு 16 இலக்க அடையாள எண் வழங்கப்படும் என்றும் தெரிவிக்கப்பட்டுள்ளது.
வீடு தேடி வரும் கணக்கெடுப்பாளரிடம் ஆதார், வாக்காளர் அடையாள அட்டை போன்ற ஆவணங்களை வழங்க வேண்டிய அவசியம் இல்லை; மொபைல் செயலி மூலம் தகவல்கள் பதிவு செய்யப்படும் என அதிகாரிகள் தெரிவித்தனர். முதல் கட்டத்தில் வீடுகள் பட்டியல் மற்றும் வீட்டுவசதி தொடர்பான கணக்கெடுப்பு 33 கேள்விகளுடன் நடைபெறுகிறது; இதில் சுமார் 31 லட்சம் கணக்கெடுப்பாளர்கள் ஈடுபட உள்ளனர். இரண்டாம் கட்டத்தில் மக்கள் தொகை கணக்கெடுப்பு நடைபெறும்; அதில் ஜாதி, மதம் தொடர்பான தரவுகளும் சேகரிக்கப்படும்; அதற்கான கேள்விகள் பின்னர் அறிவிக்கப்படும்.
பொதுமக்கள் அளிக்கும் தகவல்கள் மக்கள் தொகை கணக்கெடுப்பு சட்டத்தின் கீழ் ரகசியமாக பாதுகாக்கப்படும் என்றும், நீதிமன்ற ஆதாரமாகவோ தகவல் அறியும் உரிமை சட்டத்தின் வழியாகவோ கேட்டு பெற முடியாது என்றும் கூறப்பட்டுள்ளது. சைபர் பாதுகாப்பு முகமைகளின் உதவியுடன் தரவுகள் ‘என்கிரிப்ட்’ செய்து சர்வர்களில் பாதுகாக்கப்படும்; மேலும் மாநிலங்களுக்கேற்ப சுய பதிவு மற்றும் நேரடி கணக்கெடுப்பு தேதிகள் மாறுபடும் எனவும் தெரிவிக்கப்பட்டுள்ளது.
