தி.மு.க. பொதுச் செயலாளரும் அமைச்சருமான துரைமுருகன், வயது முதிர்வு காரணமான உடல்நலக் குறைபாடுகள் இருந்தபோதும் காட்பாடி தொகுதியில் தனது தேர்தல் பிரசாரத்தை தொடங்கினார்.
காட்பாடியில் 10 முறை, ராணிப்பேட்டையில் 2 முறை என மொத்தம் 12 தேர்தல்களில் போட்டியிட்டு 10 வெற்றிகளை பெற்றுள்ள அவர், இந்தத் தேர்தலிலும் காட்பாடியில் மீண்டும் போட்டியிடுகிறார்.
சென்னையிலிருந்து ரயிலில் காட்பாடி வந்த துரைமுருகன், திறந்தவெளி வாகனத்தில் பேரணியாக புறப்பட்டு நேற்று பிரசாரத்தை தொடங்கினார். அவருடன் அவரது மகனும் தி.மு.க. எம்.பி.யுமான கதிர் ஆனந்தும் இருந்தார்.
தி.மு.க. மூத்த நிர்வாகிகள் கூறுகையில், தற்போது 87 வயதாகும் துரைமுருகனுக்கு வயது காரணமாக சீட் மறுக்கப்படலாம் என்ற நிலை இருந்ததாகவும், ஆனால் தனது செல்வாக்கால் அவர் சீட்டை பெற்றதாகவும் தெரிவித்தனர். முதல் பிரசார நிகழ்விலேயே பேசுவதற்கு அவர் சிரமப்பட்டதாகவும் அவர்கள் கூறினர்.
சமீப காலமாக காரை விட ரயிலில் பயணம் செய்வதையே அவர் அதிகம் தேர்வு செய்து வருவதாகவும், கோடை காலம் மற்றும் தமிழகத்தில் அதிக வெப்பநிலை காணப்படும் பகுதிகளில் ஒன்றாக வேலூர் இருப்பதால் இந்தப் பிரசாரம் அவருக்கு சவாலாக இருக்கும் என்றும் அவர்கள் தெரிவித்தனர்.
