அமெரிக்கா–இஸ்ரேல்–ஈரான் மோதல் காரணமாக ஏற்றுமதி, இறக்குமதி பாதிக்கப்பட்டுள்ளதால், தமிழகத்தில் சரக்கு போக்குவரத்து மெல்ல குறைந்து வருவதாக அதிகாரிகள் தெரிவித்துள்ளனர்.
செய்தியின்படி, ஈரான் ஹார்முஸ் நீரிணையை மூடி, கச்சா எண்ணெய் கட்டணம் வசூலித்த பின்னரே சரக்கு கப்பல்களை அனுமதித்து வருகிறது. மேலும் அமெரிக்கா, இஸ்ரேலுக்கு ஆதரவாக உள்ள நாடுகளின் கப்பல்கள் செல்ல தடையும் விதிக்கப்பட்டுள்ளதாக கூறப்படுகிறது. இதனால் இந்தியாவுக்கு கச்சா எண்ணெய் உள்ளிட்ட பல்வேறு பொருட்கள் வருவதும், உணவுப் பொருட்கள் ஏற்றுமதியும் பாதிக்கப்பட்டுள்ளது.
இதன் தாக்கமாக துறைமுகங்களுக்கு சரக்குகளை ஏற்றி செல்லும் வாகனங்களின் இயக்கம் குறையத் தொடங்கியுள்ளதால், டிரைவர்கள், கிளினீர்கள், புக்கிங் ஏஜன்சிகள் நடத்துவோர், வாகன உரிமையாளர்கள் உள்ளிட்டோரின் வேலைவாய்ப்பில் பாதிப்பு ஏற்படும் சூழல் உருவாகியுள்ளது.
தேசிய நெடுஞ்சாலை ஆணையத்தின் (NHAI) திட்ட அதிகாரி ஒருவர் கூறுகையில், சென்னை மற்றும் எண்ணூர் துறைமுகங்களுக்கு தொடர்பான முக்கிய வழித்தடங்களில் உள்ள சுங்கச்சாவடிகள் வழியாக சரக்கு மற்றும் கன்டெய்னர் லாரிகள் பயணம் சுமார் 30% குறைந்துள்ளதாக தெரிவித்தார். சென்னை–கொல்கட்டா நெடுஞ்சாலையின் நல்லூர், சென்னை–பெங்களூரு நெடுஞ்சாலையின் ஸ்ரீபெரும்புதூர், சென்னை பைபாஸ் சாலையின் வானகரம், சூரப்பட்டு, வடக்கு உள்வட்ட சாலையின் மாத்தூர், சென்னை–திருச்சி நெடுஞ்சாலையின் பரனூர் ஆகிய இடங்களில் இந்த குறைவு பதிவாகியுள்ளதாகவும், போர் தொடர்ந்தால் ஏப்ரல் மாதத்திற்குள் இது 60% வரை அதிகரிக்க வாய்ப்புள்ளதாகவும் அவர் கூறினார்.
