2026 தமிழ்நாடு சட்டசபைத் தேர்தலில் காட்டுமன்னார்கோவில் தொகுதியில் போட்டியிட மாட்டேன் என்று விசிக தலைவர் தொல். திருமாவளவன் வெள்ளிக்கிழமை அறிவித்தார். அந்தத் தொகுதிக்கு ஜோதிமணி வேட்பாளராக அறிவிக்கப்பட்டுள்ளதாகவும் அவர் தெரிவித்தார்.
தன் முடிவுக்கான பின்னணியை விளக்கும்போது, கடந்த காலங்களில் தேர்தல் வாய்ப்புகளைத் தானே விலக்கிக் கொண்ட சம்பவங்களை அவர் நினைவுகூர்ந்தார். 2006-ல் கடைசி நேரத்தில் போட்டியிடாமல், தன் கட்சி நண்பருக்காக பெற்றிருந்த தொகுதியை ஒப்படைத்ததாகவும் கூறினார். சட்டசபை மற்றும் நாடாளுமன்றத் தேர்தல்களில் வெற்றி, 2016-ல் குறைந்த வாக்கு வித்தியாசத்தில் வாய்ப்பு தவறியது உள்ளிட்ட அனுபவங்களையும் அவர் குறிப்பிட்டார்.
2026 தேர்தல் வழக்கமான பொதுத்தேர்தல் அல்ல என்றும், கடந்த ஓராண்டுக்கும் மேலாக தாங்கள் அங்கம் வகிக்கும் மதச்சார்பற்ற முற்போக்கு கூட்டணியை பலவீனப்படுத்த முயற்சிகள் நடந்ததாகவும் அவர் கூறினார். குறிப்பாக விசிக மற்றும் தன்னை குறிவைத்து நடவடிக்கைகள் மேற்கொள்ளப்பட்டதாக குற்றம்சாட்டினார். இதையெல்லாம் மீறி திமுக தலைமையிலான கூட்டணி கட்டுக்கோப்பாக களம் காண்கிறதெனில் அதில் தன் பங்கு இருப்பதாகவும் தெரிவித்தார்.
மேலும், தன் போட்டி குறித்த முன் அறிவிப்பை வைத்து பதவி ஆசை, கூட்டணி ஆட்சி முயற்சி, தொங்கு சட்டசபை போன்ற யூகங்கள் பரப்பப்படுவதாகவும் அவர் மறுத்தார். கூட்டணிக்குள் சலசலப்பு ஏற்படக்கூடாது என்பதால் சில கோரிக்கைகளை முன்வைக்கவில்லை என்றும், கட்சியின் முடிவுகள் குறித்து தவறான கதைகள் பரப்பப்படுவதாகவும் கூறினார்.
சட்டசபைத் தேர்தலை முன்னிட்டு கூட்டணி ஒற்றுமை மற்றும் இடப் பகிர்வு தொடர்பான அரசியல் பரபரப்புகள் அதிகரித்துள்ள சூழலில் இந்த அறிவிப்பு வெளியாகியுள்ளது.
