தி.மு.க. தலைமையிலான கூட்டணியில் காங்கிரசுக்கு ஒதுக்கப்பட்ட 28 தொகுதிகளில் ஒன்றான விளவங்கோடு தொகுதிக்கு பிரவீன் என்பவர் வேட்பாளராக அறிவிக்கப்பட்டதைத் தொடர்ந்து, கன்னியாகுமரி மாவட்ட காங்கிரஸ் நிர்வாகிகள் மற்றும் கட்சியினர் கடும் அதிருப்தியை வெளிப்படுத்தியுள்ளனர்.
அத்தொகுதியில் போட்டியிட சிட்டிங் எம்.எல்.ஏ. தாரகை கத்பட், தமிழக காங்கிரஸ் பொதுச்செயலர் ரமேஷ்குமார் உள்ளிட்ட சுமார் 60 பேர் விருப்ப மனு அளித்திருந்த நிலையில், கட்சியுடன் நேரடி தொடர்பில்லாதவர் என கூறப்படும் ஒருவருக்கு சீட் வழங்கப்பட்டதாக நிர்வாகிகள் குற்றம்சாட்டுகின்றனர்.
அறிவிக்கப்பட்ட பிரவீன், சி.எஸ்.ஐ. தென்னிந்திய கேரளா டயோசீஸ் நிர்வாகியாக இருப்பதாக தெரிவிக்கப்பட்டுள்ளது. இதுவே உள்ளூர் கட்சியினரின் எதிர்ப்பை மேலும் தீவிரப்படுத்தியதாக கூறப்படுகிறது.
எதிர்ப்பின் ஒரு பகுதியாக, கன்னியாகுமரி மேற்கு மாவட்ட காங்கிரஸ் அலுவலகத்தில் தலைவர்களின் படம் இடம்பெற்ற துணி பேனருக்கு செருப்பு மாலைகள் அணிவித்து சிலர் போராட்டம் நடத்தியதாக தகவல் வெளியாகியுள்ளது. மேலும், சமூக வலைதளங்களில் கட்சியினர் கடுமையான விமர்சன பதிவுகளையும் பகிர்ந்துள்ளனர்.
விளவங்கோடு காங்கிரஸ் நிர்வாகிகள் சிலர் கூறுகையில், கேரளாவிலும் சட்டசபை தேர்தல் நடைபெறுவதால், கிறிஸ்தவ வாக்குகளை ஒருங்கிணைக்கும் நோக்கில் சி.எஸ்.ஐ. பிஷப்புகள் சிலர் ராகுல் காந்தி, கே.சி.வேணுகோபால் ஆகியோரிடம் பிரவீனுக்கு சீட் வழங்க வலியுறுத்தியதாக தெரிவித்தனர். மேலும், கடந்த லோக்சபா தேர்தலுக்குப் பின் விஜயதாரணி காங்கிரசை விட்டு பா.ஜ.க.வில் இணைந்ததைத் தொடர்ந்து நடந்த இடைத்தேர்தலில் தாரகை கத்பட்டிற்கு சீட் வழங்கப்பட்டதும், அதில் கத்தோலிக்க பிஷப் பரிந்துரை இருந்ததாகவும் கூறி, விளவங்கோடு தொகுதியில் வேட்பாளர் தேர்வில் பிஷப்புகளின் பரிந்துரை தாக்கம் அதிகரித்துள்ளதாக அவர்கள் குற்றம்சாட்டினர்.
