புதுடில்லி: மேற்கு வங்கத்தில் தேர்தல் தொடர்பான பணிக்குச் சென்ற ஏழு நீதிபதிகள் சிறைபிடிக்கப்பட்ட சம்பவத்தில், மாநில போலீசை நம்ப தயாரில்லை என உச்ச நீதிமன்றம் கடுமையாக தெரிவித்தது. நீதிபதிகள் மீது தாக்குதல் முயற்சி நடந்ததாக கூறப்படும் விவகாரத்தை தேசிய புலனாய்வு முகமை (என்.ஐ.ஏ.) தீவிரமாக விசாரிக்கவும் நீதிமன்றம் உத்தரவிட்டது.
மேற்கு வங்கத்தில் 294 தொகுதிகளுக்கான சட்டசபை தேர்தல் ஏப். 23 மற்றும் 29 ஆகிய தேதிகளில் இரு கட்டங்களாக நடைபெற உள்ளது. பிரசாரம் தீவிரமடைந்த நிலையில், வாக்காளர் பட்டியலில் இருந்து பெயர்கள் நீக்கப்பட்டதாக வந்த புகார்களை விசாரித்து மீண்டும் சேர்க்கும் பணிக்காக—உச்ச நீதிமன்ற அறிவுறுத்தலின் அடிப்படையில் கொல்கட்டா உயர் நீதிமன்றம் நியமித்த—ஏழு நீதிபதிகள் கடந்த வாரம் மால்டாவுக்கு சென்றிருந்தனர்.
நீதிமன்றத்தில் முன்வைக்கப்பட்ட தகவலின்படி, அவர்கள் மாலை 3 மணி முதல் இரவு 11 மணி வரை சிறைபிடிக்கப்பட்டதாகவும், உணவு மற்றும் குடிநீர் கூட வழங்கப்படாமல் துன்புறுத்தப்பட்டதாகவும் கூறப்பட்டது. இதைத் தொடர்ந்து உயர் நீதிமன்ற தலைமை பதிவாளர் மூத்த போலீஸ் அதிகாரிகளை தொடர்பு கொண்டு மீட்பு நடவடிக்கை எடுக்க அறிவுறுத்தியபோதும், மாநில நிர்வாகம் நடவடிக்கை எடுக்கவில்லை என குற்றச்சாட்டு எழுந்தது; பின்னர் உயர் நீதிமன்ற தலைமை நீதிபதி நேரடியாக தலையிட்டு நீதிபதிகளை மீட்டதாக தெரிவிக்கப்பட்டது.
மேலும், அந்த இடத்திலிருந்து அவர்கள் புறப்பட்டபோது வாகனங்கள் மீது கல்வீச்சு மற்றும் தடியால் தாக்குதல் நடந்ததாகவும் கூறப்பட்டது. இந்த சம்பவத்தை உச்ச நீதிமன்றம் தாமாக முன்வந்து வழக்காக எடுத்துக் கொண்டு, மேற்கு வங்க தலைமை செயலரை ஆஜராகுமாறு முன்பே உத்தரவிட்டிருந்தது.
தலைமை நீதிபதி சூர்யகாந்த் தலைமையிலான அமர்வில் (நீதிபதிகள் ஜாய்மால்யா பக்சி, விபுல் பஞ்சோலி) வழக்கு மீண்டும் விசாரணைக்கு வந்தபோது, தலைமை செயலர் துஷ்யந்த் நாரியாலா உள்ளிட்டோர் வீடியோ கான்பரன்ஸ் மூலம் ஆஜரானனர். கொல்கட்டா உயர் நீதிமன்ற தலைமை நீதிபதி பலமுறை தொடர்பு கொள்ள முயன்றபோதும் பதில் அளிக்காததற்காக அவர் மன்னிப்பு கேட்க வேண்டும் என அமர்வு உத்தரவிட்டது; பின்னர் அவர் நீதிமன்றத்தில் பகிரங்கமாக மன்னிப்பு கோரினார்.
