திருநெல்வேலி மாவட்டத்தில் பனைமரம் ஏறி பதநீர் இறக்கும் தொழிலாளி மீது போலீஸ் உதவி ஆய்வாளர் துப்பாக்கிச்சூடு நடத்தியதாக கூறப்படும் சம்பவம் அப்பகுதியில் பரபரப்பையும் பதட்டத்தையும் ஏற்படுத்தியுள்ளது.
அதிமுக பொதுச்செயலாளர் எடப்பாடி கே. பழனிசாமி (இபிஎஸ்) வெளியிட்ட அறிக்கையில், ஆலங்குளம் தொகுதிக்குட்பட்ட மருதம்புத்தூர் ஊராட்சியில் மணிகண்டன் என்பவர் பனைமரத்தில் பதநீர் இறக்கிக் கொண்டிருந்த போது, கள் இறக்கியதாக கூறப்பட்ட புகாரைத் தொடர்ந்து வாக்குவாதம் ஏற்பட்டதாக தெரிவித்துள்ளார்.
அந்த வாக்குவாதத்தின் போது ஆலங்குளம் காவல் நிலைய எஸ்ஐ துப்பாக்கிச்சூடு நடத்தியதாகவும், இரண்டு குண்டுகள் தாக்கியதில் மணிகண்டன் படுகாயமடைந்து மருத்துவமனையில் அனுமதிக்கப்பட்டுள்ளதாகவும் இபிஎஸ் கூறினார்.
இந்த சம்பவம் தமிழ்நாடு முழுவதும் உள்ள பனைமரம் ஏறும் தொழிலாளர்களிடையே அச்சத்தை ஏற்படுத்தியுள்ளதாக குறிப்பிட்ட அவர், தேர்தல் காலத்திலும் காவல்துறை செயல்பாடு குறித்து விமர்சனம் செய்தார். சம்பவத்தில் தொடர்புடைய அதிகாரி மீது கடும் நடவடிக்கை எடுக்க காவல்துறை தலைமை இயக்குனரை வலியுறுத்துவதாகவும் தெரிவித்தார்.
