திருநெல்வேலி: தமிழகத்தில் காங்கிரஸ் கட்சி எங்கே இருக்கிறது என்பதே யாருக்கும் தெரியவில்லை என்று தமிழக பாஜ தலைவர் நயினார் நாகேந்திரன் தெரிவித்தார். திருநெல்வேலியில் நடைபெற்ற தேர்தல் பிரசாரத்தில் அவர் இந்த விமர்சனத்தை முன்வைத்தார்.
திருநெல்வேலி தொகுதியில் அதிமுக வேட்பாளருக்கு ஆதரவாக பேசிய அவர், தாம் சாத்தூர் தொகுதியில் போட்டியிடுவதாகவும், திருநெல்வேலியில் செய்ய வேண்டிய பணிகள் அனைத்தும் முடிந்துவிட்டதால் திமுக வேட்பாளருக்கு செய்ய எதுவும் இல்லை என்றும் கூறினார். மேலும், திருநெல்வேலி அதிமுகவின் கோட்டை என்றும் தெரிவித்தார்.
பிரதமர் நரேந்திர மோடி தமிழகத்திற்கு ரூ.14 லட்சம் கோடி நிதி உதவி வழங்கியதாகவும், நாட்டின் கட்டமைப்பு வசதிகளை மேம்படுத்த மத்திய அரசு பல திட்டங்களை செயல்படுத்தி வருவதாகவும் அவர் கூறினார். காங்கிரஸ் கூட்டணியில் இருந்தபோதும் திமுக முன்னாள் அமைச்சர்கள் தமிழகத்திற்கு திட்டங்களை கொண்டு வரவில்லை என்றும் குற்றம்சாட்டினார்.
ஆலங்குளத்தில் நடந்த துப்பாக்கிச்சூடு சம்பவம் வருத்தத்திற்குரியது என்றும் வன்மையாக கண்டிக்கத்தக்கது என்றும் கூறிய அவர், போலீசாருக்கு என்ன செய்ய வேண்டும் என்பது தெரியாமல் இருப்பதாகவும், சட்டம்-ஒழுங்கை கட்டுப்படுத்துவது குறித்து முதல்வருக்கும் தெரியவில்லை என்றும் விமர்சித்தார்.
மேலும், கட்டுப்பாடு இல்லாத ஆட்சி நடைபெறுகிறது என்றும், பிரதமரை அவதூறாக பேசுபவர்களை நடவடிக்கை எடுக்காமல் விடுகிறார்கள்; ஆனால் முதல்வரை விமர்சிப்பவர்களை கைது செய்கிறார்கள் என்றும் அவர் குற்றம்சாட்டினார். கன்னியாகுமரி கலெக்டர் அழகு மீனா மற்றும் சாத்தூர் டிஎஸ்பி தங்களுக்கு எதிராக செயல்படுவதாகவும் அவர் கூறினார்.
