தி.மு.க. அறிவித்த ரூ.8,000 கூப்பன் வாக்குறுதியை முன்வைத்து, “அதை வைத்து எதையும் வாங்கலாம் என்றால், முதல்வர் பதவியை கொடுப்பீர்களா?” என்று முதல்வர் மு.க.ஸ்டாலினை நோக்கி நா.த.க. தலைமை ஒருங்கிணைப்பாளர் சீமான் கேள்வி எழுப்பினார்.
சென்னையில் ஆலந்தூர், அம்பத்தூர், வில்லிவாக்கம், ராயபுரம் உள்ளிட்ட தொகுதிகளில் நா.த.க. வேட்பாளர்களை ஆதரித்து பிரசாரம் செய்த போது அவர் இந்த கருத்துகளை தெரிவித்தார். தி.மு.க. மற்றும் அ.தி.மு.க. ஆட்சிகளில் நீண்ட காலமாக இலவச அறிவிப்புகள் வழக்கமாகிவிட்டதாகவும், குடும்பத் தலைவிக்கு மாதம் ரூ.1,000 போன்ற உதவிகள் வறுமை நீடிப்பதை காட்டுவதாகவும் அவர் விமர்சித்தார்.
ரூ.2,000, ரூ.2,500 உதவித் தொகை, ரூ.8,000 கூப்பன், ரூ.10,000 “வறுமை ஒழிப்பு” தொகை போன்ற வாக்குறுதிகளை எங்கிருந்து வழங்கப் போகிறார்கள் என்ற கேள்வி மக்கள் மத்தியில் எழாத வரை மாற்றம் வராது என சீமான் கூறினார். இலவசங்களால் தான் ஓட்டு என்றால், தங்கம், கார், பெட்ரோல், ஊதியத்துடன் ஓட்டுநர் என யாரும் வாக்குறுதி அளிக்க முடியும் என்றும் அவர் கிண்டலிட்டார்.
மேலும், கூட்டணி தொடர்பான பேச்சுவார்த்தைகள் சமீபத்திலும் நடந்ததாகவும், சில தொகுதிகளில் போட்டியிட்டு மற்ற இடங்களில் வாபஸ் பெறும் வகையில் முன்மொழிவு வந்ததாகவும், அதை தாம் நிராகரித்ததாகவும் கூறினார். நல்லாட்சி அமைய மக்கள் சிந்தித்து வாக்களிக்க வேண்டும் என்றும் அவர் வலியுறுத்தினார்.
