திண்டுக்கல்: தே.ஜ. பிரசார அணுகுமுறையை விமர்சித்த திருமாவளவன்
வி.சி.க தலைவர் தொல். திருமாவளவன், தமிழகத்தில் தே.ஜ. கூட்டணியின் “சதி முயற்சி” வெற்றி பெறாது என்று திண்டுக்கல்லில் செய்தியாளர்களிடம் தெரிவித்தார்.
மதுரையில் பிரசாரம் செய்த மகாராஷ்டிரா முதல்வரின் பேச்சை குறிப்பிட்டு, மெட்ரோ ரயில் வேண்டும் என்றால் பா.ஜ. தலைமையிலான கூட்டணிக்கு வாக்களிக்க வேண்டும் என்ற வகையிலான செய்தியை அவர் விமர்சித்தார். தேர்தல் களத்தில்கூட உருட்டல், மிரட்டல், ‘பிளாக்மெயில்’ போன்ற அணுகுமுறையை பா.ஜ. பயன்படுத்துகிறது என அவர் குற்றம்சாட்டினார்.
வட இந்தியாவில் ஜாதி, மதத்தை முன்வைத்து மக்களைப் பிளவுபடுத்தி அரசியல் ஆதாயம் தேடும் போக்கைப் போலவே தமிழகத்திலும் அதே கைவரிசையை காட்ட முயல்கிறார்கள் என்றும், அந்த முயற்சி இங்கு வெற்றி பெறாது என்றும் அவர் கூறினார். தேர்தல் முடிவு அவர்களுக்கு சரியான பாடம் புகட்டும் என்றார்.
மேலும், அ.தி.மு.க.-பா.ஜ.-அ.ம.மு.க.-பா.ம.க. இணைப்பு “பொருந்தா கூட்டணி” என கூறிய அவர், கொள்கை ரீதியாக முரண்பட்டவர்கள் தேர்தல் ஆதாயத்துக்காக ஒன்றிணைந்துள்ளதாக தெரிவித்தார். அந்த விரக்தியில்தான் தி.மு.க. கூட்டணியை நோக்கி தனிநபர் விமர்சனங்கள் முன்வைக்கப்படுகின்றன என்றும் கூறினார்.
