சபரிமலை அய்யப்பன் கோவில் விவகாரத்தில், இது “ஆணாதிக்க” கோணத்தில் பார்க்க வேண்டியதில்லை; மாறாக தனித்துவமான சம்பிரதாயம் சார்ந்தது என மத்திய அரசு உச்ச நீதிமன்றத்தில் வாதிட்டது. இதனால் அரசியல் சாசன அமர்வில் வாதங்கள் கடுமையாக மோதின.
கேரளாவின் சபரிமலையில் 10 முதல் 50 வயது வரையிலான பெண்களையும் அனுமதிக்கலாம் என 2018ல் ஐந்து நீதிபதிகள் அமர்வு தீர்ப்பளித்தது. அதற்கு எதிரான 2019 சீராய்வு மனுக்கள் பின்னர் அன்றைய தலைமை நீதிபதி ரஞ்சன் கோகாய் தலைமையிலான அமர்வால் ஒன்பது நீதிபதிகள் கொண்ட அரசியல் சாசன அமர்வுக்கு மாற்றப்பட்டன. இந்த அமர்வு சபரிமலை மட்டுமின்றி, மசூதிகளில் பெண்கள் அனுமதி, பார்சி பெண்கள் உரிமை உள்ளிட்ட மத சுதந்திரம் தொடர்பான பொதுக் கேள்விகளையும் ஆராய்ந்து வருகிறது.
விசாரணையின் மூன்றாவது நாளில், ஒரு குறிப்பிட்ட பிரிவினரை மட்டும் அனுமதித்து மற்றவர்களை விலக்குவது சரியா என நீதிபதி பி.வி. நாகரத்னா கேள்வி எழுப்பினார். கோவில்கள், மடங்களில் அனைவருக்கும் வழிபாட்டு உரிமை வழங்கப்பட வேண்டும்; பாகுபாடு ஹிந்து மதத்தை பலவீனப்படுத்தி சமூகத்தில் பிளவுகளை உருவாக்கும் என அவர் கருத்து தெரிவித்தார். இந்தக் கருத்தை நீதிபதி அரவிந்த் குமார் ஆமோதித்தார்.
மத்திய அரசு சார்பில் சொலிசிட்டர் ஜெனரல் துஷார் மேத்தா, சபரிமலை கட்டுப்பாடுகளை பாலினப் பாகுபாடாகக் கருதக் கூடாது என வாதிட்டார். பெண்கள் மட்டுமே வழிபடும் கோவில்கள் இருப்பதையும், தனித்துவமான நேர்த்திக் கடன் உள்ளிட்ட வழிபாட்டு முறைகள் இருப்பதையும் சுட்டிக்காட்டி, பக்தர்–தெய்வ உரிமைகள் பிரிக்க முடியாதவை; மத நடைமுறைகளை ஆழ்ந்த நம்பிக்கைகளின் அடிப்படையில் அணுக வேண்டும் என்றார்.
மேலும் கூடுதல் சொலிசிட்டர் ஜெனரல் விக்ரம்ஜித் பானர்ஜி, தொன்றுதொட்டு பின்பற்றப்படும் பழக்கங்களுக்கு முக்கியத்துவம் தர வேண்டும் என வலியுறுத்தினார். மூத்த வழக்கறிஞர் சி.எஸ். வைத்தியநாதன், கோவில் சம்பிரதாயத்தை மாற்ற நீதிமன்றங்களுக்கு அதிகாரம் இல்லை; ஏற்காதவர்கள் அந்த இடத்தைத் தவிர்க்கலாம் என வாதிட்டார். இதற்கு இடையில், நம்பிக்கை மற்றவர்களின் உரிமைகளை பாதிக்கும் போது சட்டத் தலையீடு அவசியமா என்ற கேள்வியையும் அமர்வு எழுப்பியது. வழக்கு அடுத்த விசாரணைக்காக ஏப்.14க்கு ஒத்திவைக்கப்பட்டது.
