தமிழகத்தில் பாஜ வளர்ச்சி பெறக் கூடாது என்ற தெளிவான அரசியல் நோக்கத்தால்தான் திமுக தலைவர் மற்றும் முதல்வர் மு.க.ஸ்டாலினுடன் “உடும்பு பிடி” நெருக்கம் வைத்திருக்கிறேன் என்று விசிக தலைவர் தொல்.திருமாவளவன் புதன்கிழமை தெரிவித்தார்.
கள்ளக்குறிச்சி தொகுதியில் விசிக வேட்பாளர் மாலதியை ஆதரித்து நைனார்பாளையம், பெரியசிறுவத்தூர், தென்கீரனூர் ஆகிய இடங்களில் நடைபெற்ற தேர்தல் பிரசார கூட்டங்களில் பேசிய அவர், ஸ்டாலின் தலைமையிலான ஐந்து ஆண்டுகால ஆட்சியின் பல திட்டங்கள் இந்திய அளவில் பாராட்டப்படுவதாகவும், பல மாநிலங்கள் தமிழகத்தின் முயற்சிகளை பின்பற்றுவதாகவும் கூறினார்.
அதிமுக-பாஜ கூட்டணியை கடுமையாக விமர்சித்த திருமாவளவன், ஜெயலலிதா உயிருடன் இருந்தபோது பாஜவுடன் கூட்டணி வைத்ததை “வாழ்வின் மிகப்பெரிய தவறு” என அவர் கூறியதாகவும், அதிமுக எந்த காலத்திலும் பாஜவுடன் கூட்டணி வைக்காது என அவர் தெரிவித்ததாகவும் நினைவூட்டினார். இந்நிலையில் இபிஎஸ் பாஜவுடன் கூட்டணி வைத்து ஓட்டு கேட்பதாகவும், அவர் வெற்றி பெற்றால் பாஜ அவரை ஒதுக்கி அதிகாரத்தை கைப்பற்றும் எனவும் குற்றம்சாட்டினார்.
பாஜ மெல்ல மெல்ல அதிமுகவை “விழுங்கும்” முயற்சியில் இருப்பதாக கூறிய அவர், இதைத் தடுக்க தொலைநோக்கு பார்வையுடன் ஸ்டாலின் வலுவான கூட்டணியை அமைத்துள்ளதாக தெரிவித்தார். இந்த தேர்தல் திமுக-அதிமுக இடையேயான சாதாரண போட்டி அல்ல; “பிற்போக்கு” மற்றும் “முற்போக்கு” சக்திகளுக்கிடையேயான போராட்டம் என கூறிய அவர், பானை சின்னத்தில் வாக்களித்து மாலதியை வெற்றி பெறச் செய்து ஸ்டாலின் கையை வலுப்படுத்த வேண்டும் என்று வாக்காளர்களை கேட்டுக்கொண்டார்.
