அ.தி.மு.க. பொதுச்செயலாளர் எடப்பாடி கே. பழனிசாமி போட்டியிடும் தொகுதியில், தி.மு.க. வேட்பாளர் தாக்கல் செய்த வேட்புமனுவின் பரிசீலனையைச் சுற்றி சர்ச்சை ஏற்பட்டதாக தகவல் வெளியாகியுள்ளது.
வேட்புமனுவில் சில குறைகள் உள்ளதாகக் கூறி அதைத் தள்ளுபடி செய்ய வேண்டும் என்று அ.தி.மு.க. தரப்பு கோரியதாகவும், இதனால் இரு கட்சிகளுக்கிடையேயான வாதம் காரசாரமாக மாறியதாகவும் கூறப்படுகிறது. நிலைமை தீவிரமானதும் மேலதிகாரிகள் தலையிட்டதாகவும், சென்னையில் உள்ள தேர்தல் அதிகாரிகளுக்கும் தொடர்புகள் சென்றதாகவும் தெரிவிக்கப்படுகிறது.
இதற்கிடையில் தலைமைச் செயலாளர் அலுவலகத்திலிருந்து அழைப்பு வந்ததாகவும், அதன் பின்னர் தி.மு.க. வேட்பாளரின் மனு ஏற்கப்பட்டதாக அறிவிக்கப்பட்டதாகவும் அந்த செய்தி கூறுகிறது. இதேபோல் மற்ற இடங்களிலும் பிரச்னைகள் எழுந்ததாகவும், அதிகாரிகள் தி.மு.க.க்கு சாதகமாக செயல்பட்டதாக குற்றச்சாட்டு முன்வைக்கப்படுகிறது.
இதனைத் தொடர்ந்து அ.தி.மு.க., பா.ஜ. உள்ளிட்ட எதிர்க்கட்சிகள், 20க்கும் மேற்பட்ட புகார்களை தலைமை தேர்தல் ஆணையருக்கு அனுப்பியதாகவும், பல தொலைபேசி தொடர்புகளும் மேற்கொள்ளப்பட்டதாகவும் கூறப்படுகிறது. தி.மு.க. ஆதரவு அதிகாரிகள் சட்டத்தை மதிக்காமல் செயல்படுகின்றனர்; தமிழகத்தில் தேர்தல் நேர்மையாக நடக்குமா என்ற சந்தேகமும் அவர்கள் தரப்பில் முன்வைக்கப்பட்டதாக தெரிவிக்கப்படுகிறது.
இதையடுத்து தலைமை தேர்தல் ஆணையரும் மற்ற இரண்டு ஆணையர்களும் அவசரமாக இரவு ஆலோசனை நடத்தியதாகவும், தமிழகத்திலிருந்து ஐ.ஏ.எஸ். அதிகாரிகள் பட்டியலை அனுப்புமாறு மாநில தலைமை தேர்தல் அதிகாரிக்கு உத்தரவிட்டதாகவும் கூறப்படுகிறது. அனுப்பப்பட்ட பட்டியலிலிருந்து 1990 பேட்ச் ஐ.ஏ.எஸ். அதிகாரி சாய் குமார் தலைமைச் செயலாளராக நியமிக்கப்பட்டு, முருகானந்தம் மாற்றப்பட்டதாகவும், மேலும் தேர்தல் தொடர்பான எந்தப் பதவியிலும் முருகானந்தத்தை நியமிக்கக் கூடாது என்று ஆணையம் உத்தரவிட்டதாகவும் தகவல் வெளியாகியுள்ளது.
