த.வெ.க. (தமிழக வெற்றிக் கழகம்) கட்சியிலிருந்து விலகி அண்மையில் தி.மு.க.வில் இணைந்த அஜிதா ஆக்னஸ், த.வெ.க.வில் பதவி நியமனங்களும் வேட்பாளர் தேர்வும் பணத்தின் அடிப்படையில் நடைபெறுவதாக குற்றம்சாட்டினார்.
தூத்துக்குடி மாவட்டம் திருச்செந்தூரில் புதன்கிழமை செய்தியாளர்களிடம் பேசிய அவர், நடிகர் விஜய் மக்கள் இயக்கம் தொடங்கிய நாளிலிருந்தே தங்களது குடும்பம் அதனுடன் பயணித்ததாக தெரிவித்தார். 2024ல் த.வெ.க. தொடங்கிய பிறகு கட்சிக்காக உண்மையாக உழைத்தபோதும் தன்னை மரியாதையாக நடத்தவில்லை என்றும், உண்மையாக உழைத்தவர்களுக்கு பொறுப்புகள் வழங்கப்படவில்லை என்றும் கூறினார்.
விஜய் கடந்த 25 ஆண்டுகளாக தங்கள் குடும்பத்துடன் பழகியவர் என்பதால் உரிமையுடன் அவரது காரை மறித்து குறைகளை சொல்லி நியாயம் கேட்க முயன்றதாகவும், ஆனால் கட்சித் தலைவராக இருக்கும் விஜய் தனது குறையை கடைசி வரை கேட்கவில்லை என்றும் அவர் கூறினார்.
மேலும், கட்சியின் பொதுச்செயலர் ஆனந்த் தன்னை கடுமையாக திட்டி வேறு கட்சிக்கு செல்லுமாறு கூறியதாகவும், த.வெ.க.வில் பெண்களுக்கு மரியாதை கிடையாது என்றும் தெரிவித்தார். கட்சியில் வழங்கப்படும் அனைத்து பொறுப்புகளுக்கும் பணம் வாங்கப்படுவதாகவும், தேர்தலுக்கு முன் வேட்பாளர்களிடமும் பணம் பெறப்பட்டதாகவும், பணம் கொடுத்தவர்களுக்கு மட்டுமே போட்டியிட வாய்ப்பு வழங்கப்பட்டதாகவும் குற்றம்சாட்டினார்.
தனக்கு அடிப்படை மரியாதை கூட கிடைக்கவில்லை என்பதால் த.வெ.க.வில் தொடர வேண்டிய அவசியமில்லை என்று முடிவு செய்து தி.மு.க.வில் சேர்ந்ததாக அஜிதா ஆக்னஸ் கூறினார். மேலும் கட்சித் தலைமையுடன் தொடர்புடையதாக கூறப்படும் சில கருத்துகள் மற்றும் விஜயின் பொது உருவம் குறித்து விமர்சனங்களையும் அவர் முன்வைத்தார்.
