தமிழ்நாட்டில் ராகுல் காந்தியின் வருகை குறித்து திமுக தரப்பில் எதிர்பார்ப்பும் பதற்றமும் கலந்த சூழல் நிலவுகிறது. அவரது பயணம் எந்த அரசியல் செய்தியை வெளிப்படுத்தும் என்ற விவாதம் அரசியல் வட்டாரங்களில் தீவிரமாக உள்ளது.
கடந்த மக்களவைத் தேர்தல் பிரசாரத்தில் கோவையில் நடந்த பொதுக்கூட்டத்துக்கு வந்த ராகுல், வழியில் ஒரு இனிப்பு கடையில் வாகனத்தை நிறுத்தி இனிப்பு பெட்டி வாங்கி, அதை முதல்வர் மு.க. ஸ்டாலினுக்கு வழங்கினார். அந்த நிகழ்வு சமூக ஊடகங்களில் சில நாட்கள் பேசுபொருளாக இருந்தது.
இந்த முறை தேர்தலின் கடைசிக்கட்டம் வரை வருகையை இழுத்துக்கொண்டிருந்த ராகுல், வெள்ளிக்கிழமை வருவதாக ஒப்புக்கொண்டதாக கூறப்படுகிறது. ஆனால் அவர் தனியாகவே பிரசாரம் செய்ய உள்ளதாகவும், முதல்வருடன் இணைந்து பிரசாரம் செய்வது குறித்து இதுவரை எந்த அறிவிப்பும் இல்லையெனவும் தகவல் வெளியாகியுள்ளது.
இரு கட்சி நிர்வாகிகளும் இருவரும் நேரில் சந்திப்பார்களா என்ற கேள்வியுடன் கவனமாக இருப்பதாக கூறப்படுகிறது. மேலும், காங்கிரஸ் கட்சிக்கு திமுகவுடன் கூட்டணி வைக்க விருப்பமில்லை என்ற தகவல்கள் பரவிய நிலையில், ராகுலின் தற்போதைய செயல்பாடுகள் அந்த பேச்சுகளை உறுதி செய்வதுபோல் பார்க்கப்படுவதாக அரசியல் கவனிப்பாளர்கள் தெரிவிக்கின்றனர்; இதனால் காங்கிரஸை விட திமுக தரப்பில்தான் அதிக “திக்…திக்…” மனநிலை இருப்பதாகவும் கூறப்படுகிறது.
