ஈரோடு மாவட்டம் கோபிச்செட்டிப்பாளையத்தில் ஏப்ரல் 18 அன்று தேர்தல் பிரசாரம் மேற்கொண்ட அதிமுக பொதுச் செயலாளர் எடப்பாடி கே. பழனிசாமி (இபிஎஸ்), முன்னாள் அமைச்சர் கே.ஏ. செங்கோட்டையனை கடுமையாக விமர்சித்தார்.
பிரசார உரையில், இரட்டை இலைக்கு வாக்களிக்க வேண்டும் என வலியுறுத்திய இபிஎஸ், தற்போதைய எம்.எல்.ஏ தானாக உயர்ந்தவர் அல்ல; கட்சி நிர்வாகிகள் உழைப்பால் வெற்றி பெற்றவர் என கூறினார். கட்சிக் கட்டுப்பாட்டை மீறி நடந்தால் யாராக இருந்தாலும் நடவடிக்கை எடுக்கும் “ஜெயலலிதா பாணி” கடைப்பிடிக்கப்படும் என்றும் அவர் தெரிவித்தார்.
மேலும், ஜெயலலிதா முதல்வராக இருந்த காலத்தில் செங்கோட்டையனின் மனைவியும் மகனும் தலைமைச் செயலகத்தில் “கேவலமான புகார்” அளித்ததாக கூறிய இபிஎஸ், தன் பதவிக்கேற்ப அதன் விவரங்களை பேசுவது சரியல்ல என தெரிவித்தார். தன் முதல்வர் காலத்தில் அவரை அமைச்சராக்கியது தவறு என்றும் அவர் கூறினார்.
செங்கோட்டையன் திமுகவுக்கு நெருக்கமாக சென்றதாகவும், ஸ்டாலின் மற்றும் கருணாநிதி படங்கள் இருந்த நிகழ்ச்சியில் அவர் கலந்து கொண்டதாகவும் இபிஎஸ் குற்றம்சாட்டினார். செங்கோட்டையனின் செயல்பாடுகள் குறித்து ஆதாரம் வைத்திருப்பதாகவும், அதை “டிவியில் போட்டு விடுவேன்” எனவும் எச்சரித்து, “ஆட்சி மாறும்; காட்சி மாறும்” என்று கூறினார்.
