புதுடில்லி: பெண்களுக்கு 33% இடஒதுக்கீடு சட்டத்தை அமல்படுத்துவதற்கான நடவடிக்கைகளுடன் தொடர்புடைய மசோதா குறித்து லோக்சபாவில் நடந்த விவாதத்தின் போது, தி.மு.க. உறுப்பினர்கள் கருப்பு உடை அணிந்து வந்ததைச் சுட்டிக்காட்டி பிரதமர் நரேந்திர மோடி கூறிய கருத்துக்கு தி.மு.க. எம்.பி. கனிமொழி பதிலளித்தார்.
மத்திய அரசு, பெண்கள் இடஒதுக்கீடு சட்டத்தை 2029 லோக்சபா தேர்தலுக்குள் அமல்படுத்த முனைப்பு காட்டுவதாக கூறி, இதற்காக தொகுதி மறுவரையறை மசோதாவை கொண்டு வந்துள்ளது. இதற்கு எதிர்ப்பு தெரிவித்து தமிழக முதல்வர் மு.க. ஸ்டாலின் உள்ளிட்ட தி.மு.க.வினர் கருப்பு உடை அணிந்து போராட்டத்தில் ஈடுபட்டதுடன், மசோதா நகலை எரித்ததாகவும் தெரிவிக்கப்பட்டது. இதேபோல், பார்லிமென்டில் விவாதத்தில் பங்கேற்ற தி.மு.க. எம்.பி.க்களும் கருப்பு உடை அணிந்தனர்.
இதைக் குறிப்பிட்டு மோடி, ‘நல்ல விஷயம் தொடங்கும் முன் தீய சக்தியின் கண் படாமல் இருக்க கருப்பு திலகம் இடும் பாரம்பரியம் உள்ளது; அதை செய்த தி.மு.க.வினருக்கு நன்றி’ என கிண்டலாக விமர்சித்தார்.
இதற்கு பதிலளித்த கனிமொழி, ஹிந்துத்துவாவை பாதுகாப்பதாக கூறும் பா.ஜ.க.க்கு கருப்பு நிறத்தில் வர்ணிக்கப்படும் காளி தேவி நினைவில் இல்லையா என கேள்வி எழுப்பினார். பெண் சக்தியை பறைசாற்றும் பெண் தெய்வமான காளி கருப்பு உடை அணிந்தவராகவும், அராஜகம் போன்றவற்றை விரட்டும் தன்மை கொண்டவராகவும் கூறினார்.
அத்தகைய கருப்பு நிறத்தையே தேர்வு செய்து தி.மு.க. எதிர்ப்பை பதிவு செய்கிறது என்றும், இந்த விவகாரத்தில் கடைசி வரை போராடுவோம் என்றும் அவர் தெரிவித்தார்.
