பொன்னேரியில் நடைபெற்ற தேர்தல் பிரசார கூட்டத்தில் பேசிய காங்கிரஸ் எம்பி மற்றும் லோக்சபா எதிர்க்கட்சி தலைவர் ராகுல் காந்தி, தற்போதைய அதிமுக “முகமூடி” மட்டுமே என்றும், பாஜவின் “உண்மை முகத்தை” மறைக்க அது பயன்படுத்தப்படுவதாகவும் குற்றம்சாட்டினார். தமிழகத்தில் அதிமுக தனிப்பட்ட அரசியல் சக்தியாக இல்லை என்றும் அவர் தெரிவித்தார்.
தமிழகத்தில் உரையாற்றுவது தனக்கு பெருமை அளிப்பதாகவும், தமிழ் மொழி மற்றும் தமிழக மக்களிடம் தனக்கு அதிகமான அன்பு இருப்பதாகவும் ராகுல் கூறினார். மேலும், தனது உரை முழுவதிலும் முதல்வர் மு.க. ஸ்டாலின் பெயரை எங்கும் குறிப்பிடவில்லை என்பதும் குறிப்பிடத்தக்கது.
பாஜ மற்றும் ஆர்எஸ்எஸ் தமிழ்மொழி, கலாசாரம், தமிழகத்தின் நலன்களுக்கு எதிராக செயல்படுவதாகவும், தமிழகத்தின் பிரதிநிதித்துவத்தை குறைக்க தொகுதி மறுவரையறை மசோதா கொண்டு வர முயற்சி நடந்ததாகவும் அவர் கூறினார். ஒவ்வொரு மாநிலமும் தனது மொழி, கலாசாரத்தை பாதுகாப்பதற்கான உரிமை கொண்டது என்றும், தமிழர் அடையாளத்தை “அழிக்க” முயன்றால் அதை அனுமதிக்க மாட்டேன் என்றும் தெரிவித்தார்.
மேலும், பாஜ அதிமுகவை “முடித்துவிட்டது” என்றும், கூட்டணி கட்சிகளை மிரட்ட காங்கிரஸ் ஒருபோதும் விசாரணை அமைப்புகளை பயன்படுத்தியதில்லை என்றும் ராகுல் கூறினார். டில்லியில் இருந்து தமிழகத்தை ஆள வேண்டும் என்ற எண்ணம் பாஜ தலைமைக்கு இருப்பதாக குற்றம்சாட்டி, காங்கிரஸ்-திமுக கூட்டணி மற்றும் கூட்டணி கட்சிகளுக்கு மக்கள் ஆதரவு தர வேண்டும் என்று வலியுறுத்தினார்.
இதற்கு முன் பேசிய கர்நாடக துணை முதல்வர் டி.கே. சிவக்குமார், திமுக-காங்கிரஸ் கூட்டணி 40 ஆண்டுகள் பாரம்பரியம் கொண்டது என்றும், பாஜ தாய்மொழிகளை புறக்கணித்து ஹிந்தியை திணிக்க முயல்வதாகவும் கூறினார். ராகுலை பிரதமராக முன்மொழிந்ததாக கூறப்படும் ஸ்டாலினுக்கு நன்றி தெரிவித்த அவர், இண்டி கூட்டணி நாட்டின் எதிர்காலம் என்றும், திமுக தலைமையிலான கூட்டணி வலுவான வெற்றி பெறும் என்றும் கணித்தார்.
