மதுரை: தேர்தல் கமிஷன் சார்பில் ஓட்டுச்சாவடி அலுவலர்கள் (பி.ஓ.) க்காக நடத்தப்பட்ட ஆன்லைன் மதிப்பீட்டுத் தேர்வில், ஒரு கேள்விக்கான பதில் தேர்வுகளில் இடம்பெற்ற “கேலிக்கூத்து” போன்ற ஆப்ஷன் சர்ச்சையை ஏற்படுத்தியுள்ளது.
சட்டசபை தேர்தலை முன்னிட்டு, பி.ஓ., பி.ஓ.-1, பி.ஓ.-2, பி.ஓ.-3 உள்ளிட்ட பணியாளர்களுக்காக நடத்தப்பட்ட தேர்வில், “முகவரி அட்டை (அட்ரஸ் டேக்) எங்கே இணைக்க வேண்டும்?” என்ற கேள்வி இடம்பெற்றதாக கூறப்படுகிறது. அதற்கான நான்கு பதில் தேர்வுகளில் ஒன்றாக “தலைமை அலுவலரின் நெற்றியில்” என்ற பதிலும் இருந்தது.
தேர்தல் பணிக்கு நியமிக்கப்பட்ட ஆசிரியர்கள் மற்றும் அரசு ஊழியர்கள், அதிகாரப்பூர்வ தேர்வில் இப்படியான பதில் தேர்வு இடம்பெற்றது அதிர்ச்சியளித்ததாக தெரிவித்தனர். பயிற்சிகளில் சொல்லப்படும் நடைமுறைகள் எவ்வளவு புரிந்துள்ளன என்பதை அறியவே இந்த முறை ஆன்லைன் தேர்வு நடத்தப்பட்டதாகவும் அவர்கள் கூறினர்.
மொத்தம் 15 வினாக்கள் இருந்ததாகவும், ஓட்டுப்பதிவு நாளில் அதிகாலை நடத்தப்படும் மாதிரி ஓட்டுப்பதிவு மற்றும் அதன் பின் பேலட் யூனிட், கன்ட்ரோல் யூனிட், விவிபாட் ஆகியவற்றை விதிமுறைகளின்படி சீலிடுவது தொடர்பான கேள்விகளும் இடம்பெற்றதாகவும் தெரிவித்தனர். மாதிரி ஓட்டுப்பதிவுக்குப் பின் சீலிடப்பட்டவை மே 4 அன்று ஓட்டு எண்ணிக்கையின் போது மட்டுமே திறக்கப்படும் நிலையில், ஆங்கிலம் மற்றும் தமிழில் “நெற்றியில்” என்ற ஆப்ஷன் சேர்க்கப்பட்டிருப்பது தேர்வின் நம்பகத்தன்மையை கேள்விக்குள்ளாக்குவதாக அவர்கள் குற்றம்சாட்டினர்.
