நாகர்கோவில்: கன்னியாகுமரி மாவட்டத்தில் தேர்தல் பிரசாரத்தில் ஈடுபட்ட காங்கிரஸ் எம்பி ராகுல் காந்தி, தமிழக வளர்ச்சியில் அதிமுகவுக்கு முக்கிய பங்கு இருந்ததாக கூறியதாக தகவல் வெளியாகி, திமுகவினர் அதிர்ச்சி அடைந்ததாக தெரிவிக்கப்பட்டது.
லட்சுமிபுரத்தில் நடந்த பிரசார கூட்டத்தில் அவர், “ஒரே மொழி, ஒரே கலாசாரம்” என்ற ஒற்றை அரசியலுக்குள் நாட்டை அடக்க பாஜ முயல்கிறது என குற்றம்சாட்டினார். ஒவ்வொரு மொழிக்கும் தனித்த வரலாறு இருப்பதாகவும், மாநிலங்களை அந்தந்த மாநில மக்கள் தான் ஆள வேண்டும் என்பதே தங்களின் நிலைப்பாடு எனவும் கூறினார்.
அரசியல் சாசனத்தின் ஆவியை பாஜ, ஆர்எஸ்எஸ் ஏற்றுக்கொள்வதில்லை என கூறிய அவர், மணிப்பூரில் ஏற்பட்ட அமைதியின்மைக்கு பாஜ தான் காரணம் எனவும் விமர்சித்தார். அனைத்து மாநிலங்களும் சம முக்கியத்துவம் பெற வேண்டும் என்றும் அவர் வலியுறுத்தினார்.
தமிழக அரசியலைப் பற்றி பேசும்போது, தற்போதைய அதிமுக பாஜ நுழைவதற்கான கருவியாக மாறிவிட்டதாகவும், பிரதமர் மோடி இபிஎஸை “ஆட்டுவிக்க” முயல்கிறார் என்றும் அவர் குற்றம்சாட்டினார். அதே நேரத்தில், ஒரு காலத்தில் அதிமுக தலைவர்கள் தமிழகத்தின் பிரதிநிதிகளாக இருந்தனர் என்றும், ஊழல் காரணமாக அவர்கள் பாஜ பிடியில் சிக்கியுள்ளனர் என்றும் அவர் கூறினார்.
மேலும், மாநில பிரதிநிதித்துவத்தை குறைக்கும் முயற்சிகளை எதிர்ப்போம் என கூறிய அவர், சமூகநீதியில் தமிழகம் முன்னோடி என்றும், மதிய உணவு திட்டம், காலை உணவு திட்டம் உள்ளிட்ட நலத்திட்டங்களை எடுத்துக்காட்டி, தமிழ் மொழி மற்றும் பண்பாட்டை பாதுகாக்க தங்கள் கூட்டணி உறுதியாக இருப்பதாக தெரிவித்தார்.
