தமிழக ஆயர் பேரவையுடன் தொடர்புடைய அமைப்புகளுக்கு வெளிநாடுகளில் இருந்து வரும் நிதியை நிறுத்த நடவடிக்கை எடுக்க வேண்டும் என, ஹிந்து முன்னணி உள்ளிட்ட ஹிந்து அமைப்புகள் மத்திய உள்துறை அமைச்சகத்தில் புகார் அளித்துள்ளன. சட்டசபை தேர்தலுக்கு இன்னும் இரண்டு நாட்களே உள்ள நிலையில் இந்த புகார் அளிக்கப்பட்டுள்ளது.
புகாரில், தமிழக ஆயர் பேரவை, கிறிஸ்தவர் வாழ்வுரிமை இயக்கம், கிறிஸ்தவர் ஐக்கிய பேரவை ஆகிய பெயர்களில் தமிழகம் முழுவதும் துண்டுப் பிரசுரங்கள் விநியோகிக்கப்படுவதாக கூறப்பட்டுள்ளது. அந்த பிரசுரங்களில் “சனாதன சக்திகளை” முறியடிக்க வேண்டும் என்றும், சிறு கட்சிகளுக்கு வாக்களித்து “மதவாத சக்திகள்” வளர இடமளிக்கக் கூடாது என்றும் கூறப்பட்டுள்ளதாக புகாராளர்கள் தெரிவித்துள்ளனர். மேலும், தி.மு.க.வை “சனாதனத்திற்கு எதிரான” சக்தியாக சித்தரிப்பதாகவும் குற்றம்சாட்டப்பட்டுள்ளது.
அதேபோல், வெளிநாட்டு நிதி பெறுவதில் மத்திய பா.ஜ.க. அரசு விதித்த கட்டுப்பாடுகள் காரணமாக கிறிஸ்தவ நிறுவனங்களின் பணிகள் பாதிக்கப்பட்டுள்ளதாகவும் அந்த பிரசுரங்களில் குறிப்பிடப்பட்டுள்ளதாக கூறப்படுகிறது.
ஹிந்து அமைப்பு நிர்வாகி ஒருவர், சேவை நோக்கத்திற்காக பெறப்படும் வெளிநாட்டு நிதியை அரசியல் நடவடிக்கைகளுக்கு பயன்படுத்தக் கூடாது என்றார். விதிமீறல் நடந்துள்ளதாகக் கூறி, ஆயர் பேரவை நடத்தும் அமைப்புகளுக்கு வரும் வெளிநாட்டு நிதி வரவுகளை ஆய்வு செய்து, தவறான பயன்பாட்டைத் தடுக்க நடவடிக்கை எடுக்குமாறு உள்துறை அமைச்சகத்திடம் கோரியுள்ளதாக அவர் தெரிவித்தார்.
