சேலம் மாவட்டம் மேட்டூரில் பா.ம.க. தலைவர் அன்புமணி ராமதாஸ் பிரசாரம் நடந்தபோது, நா.த.க. வேட்பாளரும் சந்தன வீரப்பன் மகளுமான வித்யா ராணி கூட்டத்துக்குள் நுழைந்ததைத் தொடர்ந்து போலீசார் அவரை தடுத்து வைத்தனர்.
மேச்சேரி பத்ரகாளியம்மன் கோவில் அருகே, மேட்டூர் தொகுதியில் அ.தி.மு.க. வேட்பாளர் வெங்கடாஜலத்தை ஆதரித்து அன்புமணி பிரசாரம் மேற்கொண்டார். அப்போது வித்யா ராணி கூட்டத்துக்குள் சென்று, பா.ம.க. தொண்டர்கள் சாலையை மறித்து நிற்பதாகக் கூறி, தன்னுக்கு வழி விடச் சொல்லுமாறு அன்புமணியிடம் கேட்டார்.
இதற்கு “பிறகு பேசிக்கொள்ளலாம்” என அன்புமணி கூறி பிரசாரத்தைத் தொடர்ந்தார். இதையடுத்து வித்யா ராணி அழுதபடி தரையில் அமர்ந்து வெளியேற மறுத்ததாகவும், பின்னர் போலீசார் அவரை காவல் நிலையத்துக்கு அழைத்துச் சென்றதாகவும் தெரிவிக்கப்பட்டது.
பின்னர் பேசிய வித்யா ராணி, வீரப்பன் மகள் என்பதற்காக கடந்த 10 நாட்களாக போலீசார் தன்னை பின்தொடர்ந்து அன்றாட நடவடிக்கைகளை கண்காணிப்பதாக குற்றம்சாட்டினார். பல இடங்களில் காரை நிறுத்தி சோதனை செய்வதாகவும், தேர்தல் செலவு கணக்கை தினமும் தருமாறு கூறுவதாகவும் தெரிவித்தார்.
அந்த இடத்தை எளிதாக கடந்து செல்ல முடிந்தும், பிரசாரம் முடிந்த பின் செல்லுமாறு போலீசார் கூறியதாக அவர் கூறினார். அன்புமணி குடும்பத்தினரிடம் மரியாதை உள்ளதால் நேரடியாக அவரிடம் கேட்டதாகவும், தன் மீது வழக்கு பதியாமல் காவல் நிலையத்தில் வைத்துள்ளதாகவும் அவர் தெரிவித்தார்.
