சிருங்கேரி சாரதா பீடத்தில் ஏப்.21 அன்று ஸ்ரீ சங்கர ஜெயந்தி விழா சிறப்பாக நடைபெற்றது. விழாவை முன்னிட்டு ஆதி சங்கரருக்கு சிறப்பு அபிஷேகம், ஆராதனைகள் நடைபெற்ற நிலையில், பாரதி தீர்த்த மகாசுவாமிகள் வழிபாடு செய்தார்.
கர்நாடகாவில் துங்கபத்திரை நதிக்கரையில் ஆதி சங்கரர் 8ம் நூற்றாண்டில் அத்வைத வேதாந்தத்தைப் பரப்ப நிறுவிய முதல் மற்றும் முதன்மையான பீடமாக சிருங்கேரி சாரதா பீடம் குறிப்பிடப்படுகிறது. சரஸ்வதி தேவியை ‘சாரதா’ என நிலைநிறுத்தி, தனது முதன்மை சீடர் சுரேஸ்வராச்சாரியாரை முதல் ஆச்சாரியராக நியமித்து, 12 ஆண்டுகள் தங்கி அத்வைதத்தை கற்பித்ததாகவும் மரபு கூறுகிறது.
மட வளாகத்தில் ஆதி சங்கரருக்கென தனி சன்னதி உள்ளது; அங்கு அவர் யோகாசனத்தில் சின்முத்திரையுடன் அமர்ந்த நிலையில் காட்சி அளிக்கிறார். மேலும், சரஸ்வதி தேவிக்கு சந்தன மரத்தாலான விக்கிரகத்தை ஆதி சங்கரர் பிரதிஷ்டை செய்ததாகவும், அது பின்னாளில் சாரதாம்பாள் கோவிலாக வளர்ந்ததாகவும் தெரிவிக்கப்படுகிறது.
இன்றைய நிகழ்ச்சித் திட்டத்தில் காலை மற்றும் மாலை வேத பாராயணமும், ஸ்ரீ வித்யாரண்ய வேத பாஷ்யமும் நடைபெற்றது. காலை 11:30 மணிக்கு ஹரிஹர நாமாலயம் திறப்பு விழா நடந்தது; மதியத்தில் ஆதி சங்கராச்சாரியாருக்கு சிறப்பு பூஜை மற்றும் கனகாபிஷேகம் நடைபெற உள்ளதாக அறிவிக்கப்பட்டது.
மாலை நிகழ்ச்சிகளில் வேத பாராயணம், ஸ்ரீ மாதவிய சங்கர திக்விஜய பாராயணம், ஜகத்குரு ஸ்ரீ ஸ்ரீ விதுசேகர பாரதி மகாஸ்வாமியின் அனுகிரஹ பாஷணம், மங்கள ஆரத்தி, அஷ்டாவதான சேவை ஆகியவை இடம்பெற்று, தொடர்ந்து பிரசாத விநியோகம் நடைபெற உள்ளது. விழாவை ஒட்டி குழந்தைகள் ஓவியம் மற்றும் வண்ணமிடும் போட்டிகளில் பங்கேற்று, ‘நமஹ சங்கராய’ மந்திர முழக்கங்களுக்கு இடையே கிரிவலம் வந்ததாகவும், சிறந்த படைப்புகளுக்கு பரிசுகள் வழங்கப்பட்டதாகவும் தெரிவிக்கப்பட்டது.
