தமிழக பா.ஜ.க. முன்னாள் தலைவர் அண்ணாமலை, கோவை தெற்கு தொகுதியில் தாராளமாக பணப்பட்டுவாடா நடந்ததாக குற்றம்சாட்டினார். இதனால் அந்த பகுதியில் பதற்றம் ஏற்பட்டதாகவும் அவர் தெரிவித்தார்.
சென்னையில் செய்தியாளர்களிடம் பேசிய அவர், செந்தில் பாலாஜிக்காக கரூரில் இருந்து வந்தவர்கள் பணம் வழங்கியதாக கூறினார். அவர்களை போலீசார் பிடித்து ராமநாதபுரம் காவல் நிலையத்தில் வைத்தபோது, சுமார் 500 பேர் கொண்ட கூட்டம் காவல் நிலையத்தை சுற்றிவளைத்ததாகவும் தெரிவித்தார்.
நிலைமை கடுமையாகியதால் போலீசார் காவல் நிலையத்தை பூட்டி உள்ளே இருந்து தங்களை பாதுகாத்துக் கொண்டதாகவும், இதன் காரணமாக கோவை தெற்கு பகுதியில் களேபரம் ஏற்பட்டதாகவும் அவர் கூறினார்.
மேலும் மாநிலத்தில் சட்டம்-ஒழுங்கு மோசமடைந்ததற்கு “தவறான நபர்களுக்கு அரசியல் ஆதரவு” அளிப்பதே காரணம் என அண்ணாமலை குற்றம்சாட்டினார். போதைப்பொருள் புழக்கத்துடன் தொடர்புடைய ஜாபர் சாதிக் முதல்வர் மு.க. ஸ்டாலின் மற்றும் துணை முதல்வர் உதயநிதி ஸ்டாலினுடன் புகைப்படம் எடுத்திருப்பதை குறிப்பிட்டு, கடந்த ஐந்து ஆண்டுகளில் குற்றச்சம்பவங்கள் அதிகரித்துள்ளதாகவும் கூறினார்.
தேசிய ஜனநாயக கூட்டணி ஆட்சி அமைந்து எடப்பாடி கே. பழனிசாமி முதல்வரானால், முதல் உத்தரவாதமாக தவறான நபர்களுக்கு அரசியல் ஆதரவு வழங்கப்படாது என அவர் தெரிவித்தார்.
