அவிநாசி தொகுதியில் போட்டியிடும் பா.ஜ. வேட்பாளர் முருகனை ஆதரித்து, இறுதி கட்ட தேர்தல் பிரசாரத்தின் ஒரு பகுதியாக அவிநாசியில் ரோடு ஷோ நடைபெற்றது. இதில் மத்தியப் பிரதேச முதல்வர் மோகன் யாதவ் பங்கேற்று வாக்கு சேகரித்தார்.
பிரசார உரையில், அவிநாசியை “புனித பூமி” என குறிப்பிட்ட அவர், அ.தி.மு.க.–பா.ஜ. கூட்டணி எழுச்சி பெற்றுள்ளதாக கூறினார். தேசிய ஜனநாய கூட்டணியில் சாதாரண மக்களும் அமைச்சர், முதல்வர், பிரதமர் போன்ற பதவிகளுக்கு வர முடியும் என்றும் அவர் வலியுறுத்தினார்.
மேலும், தி.மு.க.வில் ஒரு குடும்பத்தைச் சேர்ந்தவர்கள் மட்டுமே பதவிக்கு வர முடியும் என விமர்சித்தார். பிரதமர் மோடி கொண்டு வந்த பெண்கள் இடஒதுக்கீடு சட்டத்தை தி.மு.க. தடுத்ததாகவும் கூறினார். அவிநாசி கோவில் வாசலில் இருந்து பேசுவதாகக் கூறிய அவர், பாரம்பரியமும் கலாசாரமும் கோவில்களில்தான் இருப்பதாக தெரிவித்தார்; தி.மு.க. மற்றும் அதன் கூட்டணி காங்கிரஸ் ஆன்மிகத்துக்கு எதிரானவர்கள் எனவும் குற்றம்சாட்டினார்.
நிறைவு கட்ட பிரசாரத்தில் வேட்பாளர் முருகன் பேசுகையில், தி.மு.க.வை “வீட்டுக்கு அனுப்பும் நேரம்” இது என கூறி, ஊழல், லஞ்சம், பெண்களுக்கு பாதுகாப்பு இல்லாத சூழல் இருப்பதாக குற்றம்சாட்டினார். “இரட்டை இன்ஜின் ஆட்சி” வந்தால் வளர்ச்சிப் பணிகள் வேகமெடுக்கும் என்றும், அவிநாசியில் வீடு தேவைப்படுவோர் சுமார் 20 ஆயிரம் பேர் இருப்பதாக கூறி, வீடுகளை பெற்றுத் தருவதாக வாக்குறுதி அளித்தார்.
ரோடு ஷோ புதிய பஸ் ஸ்டாண்டு பகுதியில் தொடங்கி தேர் நிலையம் அருகில் நிறைவடைந்ததாக தெரிவிக்கப்பட்டது. நிறைவு நிகழ்ச்சியில் அ.தி.மு.க.–பா.ஜ. மற்றும் கூட்டணி கட்சி நிர்வாகிகள், தொண்டர்கள் பங்கேற்றனர்.
